DIARY ~ EPS-9-11

Episode-9

Lehkhaah chuan ti hian ka ziak a.

Zote, he lehkha i tana ka ziak ta mai hi min dem lo la, dawhthei takin min chhiar chhuah sak dawn nia.Tuna ka sawi tur hi i hnenah vawi tam sawi ka lo tum tawh thin a, ka huaisenna zawng zawng ka sawm khawm chung pawhin ka sawi ngam leh thin lo.Ka hma a i din a, nang ka hmachhawn che hian, ka sawi turte, ka sawi duhte, sawi tura ka lo ngaihtuahlawk te chu um bo ang maiin an bo leh diak thin. Kakha a chih a, ka lêi hian tawng nuam a tih thin teh lul nen he thu ka sawi dwn apianga a kimki leh tlat thin hi chu ka haw thin ngawt mai.Zote, ka hmangaih che tih hi hrilh ta che ila, engtinnge i ngaih ang le. He thu hrilh tur che hian zantin ka intiam thin a, chu ka intiamna chuan khuamin var pui ve leh thin si lo. Nang vang hian vawi engzatnge ka thutiam ka hlen loh pawh ka hre sengtawh lo.Eng dang vang a nilo, chân che hi ka hlau em a ni. I huat zawng a nih chuan thian ang pawhin ka en ngam tawh dawn si lo che a. He thu hi sawi lo turin ka rilru ka siam fel a, chu chu ka thinlung chhungril hian a pawm ve thei si lo. Nakinah ka inchhirna khua a sei loh nan ka hrilh ta tawp che nih hi,kum khua a ka kianga awm tur i ni si lova.Min kal san hlauh vangin ka hmangaihna che hi hrilh lo che mahila engtikni ah emaw chuan min la kal san dawn tho tho a, chuvangin, ka hmangaihna che hrilh lo che a min kal san ai chuan, he thu ka hrilh che avanga min kal san a nih pawhin pawi ka ti ta lo zawk a ni.Beiseina mitin ka thlir che a, ka rilruin a beisei che a, ka ngaihtuahnain a zui che a, ka thinlung hian a nghak thin che.Ka hmangaih che ka tih hi ringhlel suh la, ka hmangaihna che hi i pawm a nih chuan he khawvela mipa vannei ber ka nih loh pawhin a dawttu chu ka ni tal ang. Min pawm sak theilo a nihchuan theih chu nise he lehkha ka pek hma che khapawh kir leh ka duh ngei ang.Mualpho in min siam lo la, i chhanna chu engpawhnise ka lo nghak reng a nia.Ka hmangaih che..

Ka tih fo thin angin library ah chuan ka thu leh ran tawh a, Zotei lokal chu ka nghak a, ka rilru hmanhmawh vang nge lo thleng har ka ti hle a, ka lehkha ziah chu ka kekawr ipte chhungah chuan ka hum thlan dap dap tawh a, a lo thlen huna ka sawi tur te, ka tih dan tur te ka ngaihtuah neuh neuh a, ka ngaihtuah ang chuan ti thei tak maw.Nghakhlel em em chung si chuan a lo thlen hun chu ka huphurh em em leh lawi si a, ka lehkha ah pawh chu pawh thler a, bawlhhlawh bawm a paih mai chuka duh rum rum a. Chu lehkha chuan ka hmangaih Zotei nena kan inkar chu a pawt hnai dawn nge daidanna bang sang tak a siam zawk dawn tih lah chu ka hre der si lo.Zotei bulah hian thil reng reng sawi hi zak leh ngamlo hrim hrim ka ni lova, hmangaihna lam thu sawi ka ngam lo mai chauh zawk a ni. Ka tan chuan a sang em a.

Library chu a ri thlep thlep a, ka hawi phei chuan Zotei chuan nui sen sen pah chuan ka lam a rawn pan a, a sam ngil siau chu a han hui zauh a, a nuih zawnga a biang sum khuar dek chu a lang chiang hle a, nidang zawng ai chuan a inhmeh tharin ka hria, ka lo nuih let ve a, mahse, ni dang ang ngawt chu ka ni lo, min mawlhtu a awm, ka zam ru tlat.Ka hmuh fo tawh ni mahse, a lokal chu a chhip atanga a ke ler thleng chuan mit khap lek lo chuan ka lo thlir a, a sam dum tle hlarh te, a mit meng fiah kalh te, a khabe zum deuh te, a kutzungtang sin sengte, cher hauh si lova,thau ti a sawi chi a ni hauh lote, a mal mum tha tak leh a thawmhnaw inbel a inhmeh vek maite chu midang mit ni lovin ka mitah chuan sawiselna tur reng reng a awm lo.

Ka bul a lo thlen chuan," Min van en chik em em, dik lo a awm mi, ka thawmhnaw hi ka inhmeh i ti vak na nge." a ti a,"Teuh nang, i inhmeh ka ti lutuk zawk,"
"ka van lawm, . .i va thleng hma awm ve, lehkhabu min zawn pui lawk la, i hman chuan.""Aw" tih pah chuan ka lu ka bu nghat a, ka tho a, ka zui nghal a.

A lehkhabu duh kan hmuh hnu chuan engengemawsawiin kan titi a, ka lehkha ah chu ka hum rauh rauh reng a, pek leh rih loh mai chu ka duh rum ruma.Ka rilru chu ka siam fel a, zan khua a ka buaipui ve chu ka ti thlawn lo ang. Ka pe ngei tur a ni, ka tawn tawn ka tawng anga, ka thlen thlen ka thleng ang. ka hma a thil awm apiang ka hmachhawn ngam tura ni. Mipa fa ka ni lawm ni. Keimah leh keimah chu ka infuih mawlh mawlh a.Class ka neih leh hma a pek ngei chu ka duh a, ka lehkha ah chu ka phawrh a, ka sa ap ap a, ka thlan a tla lek lek a, ka aw ka thian kharh phawt a, ka hrawk chu hnawhtu awm ang mai a ni. Ka tawng chhuak zo tawh dawn lo amaw tih hnu chuan lawi deuh rât chuan ka tawng chhuak thei hram a,"Zote, eng angin nge i ngaih ang ka hre lo, i hnenah sawi duh tam tak ka nei thin. Mahse, ka sawi dawn hian ka theihnghilh leh tlat thin a, he lehkha hi la la, i lo chhiar dawn nia." tih pah chuan a kutah ka hmeh bel a, thu dang sawi lo chuan class room lampanin ka chhuah san nghal a.

Episode-10

Chutia a rin loh taka lehkha ka pe chu a hamhaih nge ni,engmah a sawi lova,min en reng ringawt a.Hawi let lo chuan class room lam chu ka pan dingnghal nal nal a.Ka tum ka hlen a,ka tih tur chu ka ti zo ta,a bak chu a kutah a innghat tawh.Ka ngaihtuah let a,mahni lehkha ziah mahni ngeia han pek chu ka nuih a za ang reng a,ka zak leh hnuhnawh hle a,mahse,pawi ka ti hran lo.Thiante chu nei mahila an hriatloh a chin fel chu ka duh zawk a,dik tak chuan ka ring zo chiah hlawm lo a ni.Eng chhanna nge ka dawn dawn lah ka hre der silo bawk nen.Class room chhungah chuan ka rilru a awm lo hrim hrim a,thu ve reng mahila zirlai engmah hriat ka neilo.ka ngaihtuahna chu zotei ah chuan a awm a,engtinnge a ngaih ang,engtinnge min chhan ang.min hnawl turin ka ngaihtuah ngam lova,min pawm turin ka beisei sang lutuk hek lo.Kei aia tha leh zahawm zawk atân hian an tam lutuk chuan beiseina min neih san tir ngam thin lo.

kan intawn dante,kan inkawm chho dante ka ngaihtuah kir a,class ban hunah ka hmu ngam a ngem?Hmu lo phawt ila a tha zawk a ngem? Ka rilru chu a insual buai hle a,thuthlukna mumal pawh ka siam thei lo.

Chutih lai chuan ban a lo hun ta reng mai.Chhuak lova in a awm daih theih dan awm se ka ti rum rum a,chutih rualin a hmel hmu lova haw chu ka ui viau lawi si a,mahni a haw mai tum chuan ka bike awmna lam chu ka pan a,ka thlen dawn tep chuan Dina tia ko ri chu ka hria a,ka hawi let chuan Zotei thiannu Sangsangi a lo ani a,ka bul a rawn thlen chuan,"vwin chu i va induh ve,mahni a haw mai i tum a law.Zotei'n a nghak reng che nia."Engkim hria a ka rin a vang chuan ka zak chu ka sen nghal trawn trawn a,chhan mai dan tur chu ka hre lo hle a,"A haw tawh ka ring a." ka ti ringawt a.Ka lai vel chu min nuihzat riau in ka hria,min fiamzui ta lo chuan,"Gate bulah a nghak che,va phei vat rawh."a ti a.a nui deuh tat tat a,ka che lai vel min nuihzat deuh chu ka haw ang reng hle a,ka rilru erawh a lawm viau thung lawi si a.Gate lam pan chuan ka phei nghal a,Zotei chu amah chauhin a lo ding a,amah chauhin a ding ka titakna in a bul hnaiah chuan midang an awm tho a,kal vel pawh an awm tho mahse din pui a nei lo ka tihna mai a ni.A bul ka thlen chuan nidang angin ka en tha ngam chiah lova,a dan a dang tlat tawh."I va hmanhmawh awm ve,bazar min kal pui la ka duh a,i hman chuan."a ti a."Hmanhmawh hran love,kan kal dawn nia,bike ka va la lawk ange."ka ti a.A chhanna pawh nghak chuang lo chuan ka kal nghal a.A ni chu ahma ang thoin pangngai takin a awm theia,kei chu ka thei lo,ka zak tlat.Lehkha a ka thil sawi kha a haw lo chu a ni phawt mai,ka rilru chu chhungril takah chuan a lawm a,ka ke pen te chu zang sawt in ka hria a,kawng sira bawlhhlawh trin an khai te chu pet thlawh daih mai te pawh ka chaka,chu erawh ka ti ta em lo.

Bazar lam pan chuan kan tlan nghal a,tlai lam mah nise,a lo la tawt phian a,thawmhnaw leh thil dang dangte chu kan en kual a,a duh zawng kan lei zawh hnu chuan thil ei turin restaurant ah kan lut a,a awmna chu a biru deuh vang nge mi an lo awm vaklova,a faiin a thianghlim reuh hle nghe nghe a,hmanhmawh vak lova titi pah nana chawlh nan chuan duhthusam a ni.A kil lam fal deuhah chuan thut hmun kan rem a.Inhma tawn chuan kan thu a,eiturte kan chah hnu chuan min melh ralh pah chuan, 'Thu ziah i van thiam em em." nuih deuh suk pah chuan a ti a,a zakleh deuh si chu hnuai lam bihin a kut tin a sik neuh neuh a,keipawh chu zak ve deuh tho mahila a lai hmel ka hmuh takah chuan ka inti zak lo lui a,"Fiamthu thawh nan ka ti lo nia,engtinnge min chhan dawn."ka ti a.Thawk a lak halh hnu chuan "i hre thiam mai lo a mi.""Hrethiam nang,i sawi loh te chuan." ka ngam ve lak lawh tlat tawh,ka lo huphurh thin teh lul nen,enghe hu a lo nih lo hi ka ti rilru a."I van sual tak,i hrethiam lo lui tlat a,pawm sak lo che ila,vwin tlai hian ka chhuah pui dawn che a mi."a ti a."ka van lawm tak,i ka atang ngei a hriat ka duh a,ka beiseina a thlawn lo ti raw." fa in a nu hnen atanga chhanna nghakhlel taka a lo thlir ang mai hian a chhanna chu ka nghakhlel a,a sawi ai sawi mai chu ka duh hial ta ve ang."I sawi har ka ti lutuk a,hmeichhia zawkin a sawi hmasak ka ngam si lova,ka beidawng hman tep a ni."Chhan ka tum mek lai chuan kan eitur chah chu a lo thleng a,chhang ta lo chuan ei pah chuan kan titi zui a,kan awm dan turte kan hma hun turte kan sawi dun a,kan hlim hle a,a ruka hmangaihna lo piang,up beh tlat,chhuah zalena a awm ta chu,bawm tawt atanga chhuak ang mai ka ni a,ka tan khawvel chu a par thar leh a,kha tih laia ka hlimna kha engmahin a lei zo hian ka ring lo.e}

Episode-11

Thian anga inkawm reng thin nula tlangval inngaizawng a kan awm ta chu awm thiam loh lek lek chang a awm thin. Naute a nu kianga a pangchang ang maia han pangchan changte pawh kan nei thin.Chu chu inngaihzawnna a bet ve tlat a ni miau a,dem tur pawh kan ni bik love.Engkim hi a hun lai a zir vek a nia.Harsatna tawk lovin kan inzui ve zel a,inhmangaih zawh poh leh thikthu a chhia an lo tih thin te pawh chu a takin kan tawng chho ve zel a,thinrim chang leh lungawi loh chang nei ve thin mahila,chu hmangaihna bawk chuan engkim a thawi dam leh thin.Thianghlim takin kan inkawm a,sual lam kawng kanngaihtuah ngai lo,kan pahnih chauh a kan awma taksa lum a innek a innek chuan hnuai lam ngaihtuah ve chang chu a awm na meuh mai.mahse,a tak ti puitling lo turin kan inveng hramhram thin.Chu chuan kan inhmangaihna pawh a ti zualin a ti thuk sawt in ka hria.Inneih hma a mipat hmeichhiatna lo hman hi ka rilruah a awm lo hrim hrim a.duh pawh ka duh hek lo,kan hmangaih tak tak te chu an zahawmna kan vawn him sak zawk tur a ni tih chu ka thlir dan leh ka pawm dan a ni.Thiante'n an bialnute an mut pui thu an sawi a,in tihtheih nan tak an hman chang phei chuan ka lo ip chawih chawih thin.

Zoteite inah chuan ka leng ve zauh zauh a,a chhungte pawh chuan min be chhe hran lo.mahse,min biak chhiat loh avanga ngaih ti tha ngawt tur ka nilo tih chu ka chiang lutuk tlat.kei thawhchhuah neilo,pa te thawhchhuah sa ring a,tlan khu ve mai mai chu,an makpa atan min it vaklo ang tih pawh a rintheih a,chubakah,an fanu naupang ber leh an duat rawn keini ang inchhunga lawi tir an phal chu a rinawm loh.Zotei nen pawh kan sawi dun thin a,chu chu kan hlauh ber pawh a ni thin.Reilote a maw tih chhungin kum a lo vei ve ta reng mai.College atangin kan chhuah tawh avangin nitinkan inhmu thei tawh lova,kan lungleng dun thei em em a.kan inngai ngawih ngawih a,mahni tul tulin kan tul a,inhmuh fo lah a theih si loh,phone in kan inbe reng thung a,inhmuhna hun remchang kan hmuh erawh chuan kan bawh pelh ngai meuh lo.

Ka phone chu a rawn zai rat rat a,Zotei a lo ni a,phur fahranin ka la a,mahse,Zotei aw chuan nidang a ang lo,a lungchhe tlat,a chhan ka zawh chuan,a chhungten min duh loh thu leh a pasal tur an zawn sak thu min hrilh a,a rilru a hah thu chu min hrilh mawlh mawlh a,a tuka sangsangi teinah in hmuh a duh thu min hrilh a,a phone chu a dah a.Ka khumah ka thu hnawk a,ka eng tih mah a tui lo,Kan lo hlauh ruk em em chu a thleng ta,thleng tura ka lo rin lawk mahnise a taka han hriat takah chuan tawrh har ka ti tak zet a.Kan nu ka ngai ngawih ngawih a,min la dam pui vein,chhungkaw zahawm ve deuh te han ni ve ila chuan hetiang ringawt chu kan ni bik lo ang.

Zotei chu ka ngaihtuah a,lo innei ta pawh ni ila,nuam takin ka siam thei dawn lova,retheihna leh hrehawmna a hmachhawn nghal ringawt tur chu kangaihtuah a,a nawmsakna tur nih dawn chuan ka then zawk mai dawn em ni?Sum leh pai vanga a chhungten amah rawn hauh lova,a pasal tur an zawn sak te chu ka ngaihtuah a,ka thin a rim a,zotei ka khawngaih em em bawk a,a hmangaih miah loh bula tuk zan a hmang tur ringawt pawh chu ka khawngaih lutuk tlat.Min hmangaih avangin engkim min hrilh a,keiin harsatna a tawh lai,tanpuitu a mamawh em em laiin ka hnungchhawn ang maw,teuh lo mai.Zote,kaphatsan hauh lo ang che,i kiangah ka awm zel ang.ka rilru chuan ka ti mawlh mawlh a.Zotei chu phulo viauiin a chhungten min duh ring lo mahila chutia min duh loh thu ka'n hriat takah cuan,ka thinrim ve phat a,a chunga an tih dan te ka ngaihtuah a,ka in sawh ka in sawh a,kei min duh lohvanga a pasal tur an zawng chu ka pawm thiam thei thlwt lo,in duh ang chuan in awm bik hauh lovang,run luih chu ka chak ta tlat,naktukah sangsangi te inah kan inhmu anga,kan inkar thu tawp kan siam ang.

*

DIARY ~ EPS-7-8

Episode-7

Innghah khawmna hmun tur ka thlen chuan an lo awm sup sup tawh a, ka thiante ho zawng chuan kamit ka len kual a, ka awmna piah deuh atang chuanbiaka chuan min lo hui lauh lauh a, an awmna lam chu ka pan phei nghal a. An bul ka thlen chuan biaka chuan," Tunge i phurh dawn?" a lo ti nghal tawng a."Phurh tur ka neih pawh ka hre lo" ti a ka chhan zawh rual rual chuan," Emily saw phur mai teh, Kimkimi phurh ka duh sia, amah a bus a chuan tir ahreh deuh a, i duh chuan i c.k pui nghal dawn nia," a'n ti chhunzawm nghal zat a.Phurh tur dang ka nei lo bawk nen tui vak lo chuan,"pawi hlei nem" ka ti a. Kan thiante ho chuan min lofiam zauh hlawm bawk a.Ngaihzawng hi ka ngaihsak vak lem lova, thianten min dem fiam chu thuhran nise, ngaihzawngti a han sawi tur ka la nei lo. Kan thian panga chuan bike kan keng vek a, an bialnu te an phurh vek dawn avang chuan emily pawh chu phurh ka remti ve mai mai chauh a ni. A inchei duh dan te,a sam a chhip a kang vah a a trawn te, a mit dum kual ruih te, an thianho a an nui ring thei lutuk te chu ka lawm hran lo.A kal tur ang ang kan thlen kim chuan kan chhuak ta a, bus tlan liam zawh kan nghak a, an tlan liam zawh hnu chuan kan thian ho chuan kan in zui chhuak ve diah diah a.

Harsatna tawk lem lovin kan picnic na hmun tur chu kan thleng a.Khua a lum bawk a thenkhat chu tui an cheng nghal bawrh bawrh a, keini thian ho pawh chuan mihmuh lohna tur deuh thutkhawmna atana rem si chu kan zawng nghal zung zung a, kan duh ang kan hmuh hnu chuan kan thu bial laih a, muana chuan ahma zan lama biaka nen an lo ngaihtuah lawk diamtawh a senchi chu a rawn phawrh zal zal a, mipa hoin kim chuan a rawn thli kual dan dan a, hmeichhe ho in atan beer a rawn phawrh tel bawk a.Kan lu a kai tan a,aw ki a sang tulh tulh a, tawng kan inchuh nawk nawk a, hmeichhe ho pawh chu an beer in a thawh deuh takah chuan kham khawp lovin kan in lai chu min dawm pui ve zel a, ka rin aiin an in thei phian leh nghal a.

Zu hi ka in zen zen ngai lova, kût bawr ah leh picnic ni khuate, thian ho chaw eikhawm velah hi chuan ka in ve mai thin a, a hnu ah ka ti zui leh ngai lo. Ruibuai khawp in ka in ngai lova, tlem a ka kai deuh chuan ka duh tawk mai thin. Zu hi a hranpain a sualna ka hre lova, a hmangtu a zir ka ti ve thin. Chumi avang chuan kohhran leh khawtlang duh loh zu hi a thra e ka tih na erawh a ni chuang lo.Rei tawk fang kan titi a,kan thut ho hnu chuan a kawp te te chuan an kal hrang ta hlawm a, emily nen chauh chuan kan bang ta. Sawi tur ka van hle a, hmawlhin lei chu ka thai ka thai a, nge a beisei chu ka hre lova, min haw hran lo tih chu ka hria.Ngaihzawng ka la nei ngai lova, zei loh sa bawk nenhan tih vak dan tur ka hre mai lo.

Ngaihzawng angin ka en lo hrim hrim a, tawm fal pui phei chu kaduh lo hrim hrim, duh loh chu thuhran a ngam pawhka ngam hek lo. Zu te in in lu te kai ve deuh mahse ka rilru a fim tlat a, ka chhia leh tha hriatna ka hlauh ngai lo.Sawi mai tur a hre bîk lo bawk nen amah chauh a kal san ka hreh si, tui chen puiah ka sawm ta ringawt a, lungawi hmel vak lo chuan min zui ta tho a, tui chenna ah pawh chuan ka hnaih tha vak duh lova, miin min fiam ka hlau ka zak tlat. A hnu deuhah chuan a mi duh zawng a hmu a niang chu an bo ta daih a, ka thawveng huaiin ka hria.Tui chu ka cheng zel a, a thuk lamah mi an tlem avang chuan ka awm ber a, tui ka hleuh lai chuan ka chawn tha ka leng chat ta hlau mai a, a na ka ti lutuk chu ka then nai nai a, ka ke ka leng thei tawh lova, lei ka rap pha bawk silo. Ka bul hnaiah han pun tur an awm mai lo nen ka rilru a buai deuh a, kapil barh a, rilru fim ka pu leh thuai a, ka ban hmang chuan a ko tlang lam pan chuan ka in hai phei a, ka thleng hram hram a, ka chhuak lawk thei lova,ka tlathla leh thin a.Tu emaw hian ka banah min vuan a, min kai chhuak thei hram a, ka hawi chhuak a, a hmel ka ena, ka zak lutuk chu ka sen nghal trawn trawn a, kan college a hmeltha ka lo tih ruk ve em em zotei a lo ni a, pangngai tak pawh a ka zah em em biak pawh ka biak that ngam ngai loh hma a chutiang a ka awm chu ka zak kher mai.

Ka ke hmawr chu ka en a, ka kezungtangte chu a tha chuan a lo pawt khawr vek a, zah rengna hun a ni lo tih ka hria, ka chawn tha chat chu ka hrilh a, ka chawn leh ke vel chu min hmeh sak nawk nawk a, ka dam sawng sawng in ka hria."ka lo en reng che a, i tal buai deuhin ka hria a, i pil bawrh khan midang hrilh ka tum a, he lama i rawn in hai phei leh takah kha chuan i ti fiam vel mai maia nih ka ring a." a ti siam siam a, zak viau mahila chutia min buaipui vel chu nuam ka ti letling phian a.

Episode-8

"In thlak rawh, khawnge i thawmhnaw i dah, ka lo ken ang che"a ti a. Ka thawmhnaw awmna lam chuka kawhhmuh a, ka kal bai saih saih a, min lo zui vezel a.Ka inthlak zawh hnu pawh chuan kan pahnih chuan kan inzui ta zel a, a thiante zingah pawh a kal bik chuang lova, kan titi a, kan inkawm bawrh bawrh a, ka zahna pawh chu a kiang ve hret hret zel a.A bulah chuan inngaihzawnna lam thil ka sawi ngam lo hrim hrim a, ka zah tlat. Chubakah min duh ve theih ka ring ngai lova, ka cho phakah ka ngai lo hrim hrim. A huat thu sawi mawlh chu ka hlau va, thian angin kan inkawm a, thian thar kan inchhar chu a ni ta reng mai.Chaw ei dawn hnaih chuan a thiante zingah chuan min kal san a, keipawh chu ka thiante ho nen chuankan awm ho leh tawh a, min fiam nak nak hlawm a."Emily nen khan in in hmu fuh thei vak na nge?" minti laih laih a, engmah sawi lo chuan ka nui liam ve mai mai a.

Zotei lam erawh an sawi kai lem lova, rilru tak chuan ka lawm ru ang reng hle a,Chaw kan eikham fel chuan haw turin kan inpeih hle tawh a, Emily ka ruala a lo haw leh ka rin a vangin Zotei chu haw rual puiah ka sawm ngam lova, Emily midangin an phur haw dawn tih ka hriat leh tak si ah chuan Zotei ka lo sawm lo chu pawi kati hle a, mahse, lo sawm pawh ni ila, a duh chu ka ring chiah chuang lova.In ka thlen chuan ka inbual a, ka chauh deuh avang chuan ka mu nghal a, chhun lama ka hun hman te chu ka ngaihtuah let mai mai a, Zote in min buaipuidante, a thiante zinga awm lova ka bulah a awm ta daih te chu ka ngaihtuah a. Min duh ve a ni thei a ngem? Nilo. . .keini ang chu min duh thei lovang, a fel êm a, min be chhe lovin min kawm ve mai mai ani.Ka duh thu hi ka hrilh mai dawn em ni...hrilh ta ila engtinnge a ngaih ang le. . .hrilh leh lo ang, min lo hnawl tase, ka tan a zahthlak dawn lutuk. Tihian thian angin inkawm mai mai ila a tha zawk. Ka rilruchu ka kawm melh melh a, chhun lama ka hun hman chu nuam ka ti veng veng a, ka khua a har veng veng bawk a, Zotei ngaihtuah pah reng chuan ka hriat loh hlanin ka lo mu hil a.A tawi zawngin sawi ta mai ila, Zotei nen hian kan inkawm chho zel a, kan inzui ngun tulh tulh a, kan inngaina tulh tulh a, engkim kan inhrilh tawn a, class awl lai hi chuan kan inzui deuh chawt a, ka thiante zingah ka awm tlem tulh tulh a, Zotei bulah erawh ka awm tam tulh tulh thung a.

Kartawp inrinni leh chawlhni ka nghahhlelh thin teh lul nen Zotei nen kan inkawm chinah chuan rei ka ti thei ta em em a, ral thuai thuai se ka ti thin. Ka thu chu nise sawrkar chawlh pawh a awm lo ang.Class kal ka taima thar em em a, lehkhazir erawh kataima tel chuang hlei lo a, Zotei hmel hmuh leh a kianga awm chu ka thlahlel ber a, a bula ka awm hi chuan ka hahdam sawng sawngin ka hria a, a kiangah chuan ka thinrimna zawng zawngte um bo in awm a, ka thinchhiatna te pawh theihnghilhin a awm thin.

Ka nun chu min khalh ngil sak a, kawng diklo ka zawh tur min veng thin, ka tan a hlu a, ka lei malsawmna liau liau a ni.In ngainain inkawm ngeih viau in, duhin hmangaih em em in, thlahlel viau mah ila, thian thra nihna chuan kar min dan a, ka sawi ngam loh chu thuhransawi a rem meuh lo a ni.
Hmangaihna erawhin thian a thliar si lo.
"Hmel hriatloh atangin hmel hriatah.

Hmel hriat atangin thianah,

Thian atangin thian thra ah,

Thian thra atangin ngaihzawngah,

Ngaihzawng atangin nupa ah."ti a an lo sawi thinte chu ka ngaihtuah neuh neuh thin.

Hun a liam a, ni a liam a, ka duhna leh hmangngaihna erawh a liam pui ve si lo, ka duhna chu a zual tulh tulh a, ka ngai ngawih ngawih a, ni khat pawh sawi loh zan khat lek pawh rei ka ti a, khawvar hlan ka nghakhlel em em thin, zotei ka hmuhna min dal thei turin tuifinriat a zau tawk lova,tlangte lah an sang tawk hek lo, a tello chuan ka nun chu a ruak a, ka ngaihtuahna a kiangah a awm a, ka nunah a ni aia pawimawh tawk a awm thei hek lo. Heng zawng zawng a kianga sawi turin ka huaisen tawk lova, chakna lah ka nei hek lo, a chhan chu a thianpa ka ni tlat a tin ni.Ka duhna leh hmangaihna te a kiangah chuan ka thup hram hram a, thup vek sen erawh a nilo, a chang chuan a hriatthiam ve mai te ka ring thin. Mahse, engmah a sawi ngai si lo. Ka zep reng thei ta lova, hmai chhana sawi erawh ka la ngam chuang lova, ka pen leh lehkha chu ka ruai ta ringawt a."Dawihzep" tiin min dem a nih chuan, ti hian ka chhang ang che," Ka hma a ding tur hi Zotei a ni tlata lawm." tiin.

DIARY ~ EPS-4-6

Episode-4

Ka nu boral atang chuan hun a liam ve zel a, ka pa pawh chu a hna zawm a lo hun ve leh ta a, ka pa a hna kal a ngai bawk si, in lam enkawlah rin tlak kan la ni lo bawk nen ka nî fanu nula ve uaih tawh chuan min awm pui a, ani a lo awm takah chuan ka pa pawh chu a hahdam ve deuh a.Kan khawsa ve naw naw a, ka pa sawrkar hnathawk a ni bawk a, sum lamah chuan kan harsa hran lo. Mahse, nu tel lova khawsakna inchhung chu a kim lo tlat. Kan inchhung chu a tla bal hret hret a, ka nu dam laia kan inchhung hnûm hlarh te, kan in leh a vel fai han thin te kha a hnawk hle tawha. Keini chu sawi loh kan inkawt a pangpar te pawh chuan duat taka enkawl a, zing tin leh tlai tin tui pe thin tu ka nu chu an ngai ve thin ngawt ang. An hnahte chu a ro zo a, a par ve chhun te pawh chu fere te te an ni hlawm a. Ka nu damlai a mawi taka par vul thin kha hmuh tur a awm tawh lo.

Hun a liam a, kum a liam ve zel a, ka pa in ka nu damlai a a chin ngai reng reng loh chu a ching thar a, tlai tak takah office a rawn haw a, zu rim a rawn nam fo a, zan riah pawh kan rualin a kil ta meuh lo. Kan lakah erawh a sual hran lova, kan in erawh a zah awm lo tulh tulh in ka hria. Ka nî fanu u thani lah chu a lo awm tirh chuan a fel ve viau a, tunah erawh engnge maw a hriat ni, a inchei hlarh hlarh reng a, chhunah kan skul kal hlanin a bialpa in a rima, nileng lengin engmah ti lovin an lo inkawm a, kanskul ban hma deuh hian a haw ve chauh zel a.

Ni khat chu chawhnu lam kan chawlh avangin ka haw hma a, in ka thlen chuan kawngkhar chu ka hawng a, inchhungah chuan tumah ka hmu lo a, u thani chu a muhil a nih ka ring a, ngawi reng chuan ka nau nena kan room lam chu ka pan a, ka inthlak zawh chuan thiante nena infiam tura len chhuah leh mai ka tum a.Room atanga ka chhuak chu mipa tawng thawm kahre ta tlat. Ka beng dawh in ka han ngaithla chiang a, u thani room atanga dim taka phun leh zauh thin chu ka hria a, hriat chian chu ka chak ta tlat a.Thawm dim takin u thani room lam chu ka pan pheithrem threm a, a room kawng khar chu a lo inkalh a, a room bang leh ka beng chu ka chuk tuah a, thawm chu ka ngaithla a, thawm chu a reh daih a, mahse thaw ri halh halh ri chu ka hre thei a.

Enge an tih hriat chakna chuan ka chhungril atang chuan min tur at at a, bang awng chu ka zawng kual a, ka hmu ta mai reng a, ka bih dek dek a, ka rei leh!. . .a bialpa nen chuan ruak vekin evi leh adama suit tak meuh chuan a khumah chuan an lo mu dun a, an in keih mawlh mawlh bawk a, an duh thawh dun em em leh nghal.Ka la hmuh ngai reng reng lo ka hmuh avang chuanka zak lutuk chu ka kâ ka hup a, rei pawh en ngam lo chuan ka tlan chhuak a, thiante zingah pawh kal ta lo chuan mahni in ka tei rek rek a.

Skul ban hun awm velah chuan ka haw a, u thani chuan eirawngbawl a lo tan mek a, skul uniform thlak vek a min hmu thut chu a hamhaih chiang kher mai. A hmel a hlauhthawnna lo lang chu ka hmu thei a."Engtik khan nge i lo hawn a," a ti a."chawhnu kan chawl a, i muhil a nih ka ring a, ka leng leh daih a," ka ti liam puat a. A ngaih a tha zan lo tih chu a hriat theih a, engmah erawh sui zui lovin a ngawi ta daih a.Ka pa lah a ruih fo avang chuan u thani awm dan chu ka hrilh duh lova, ka hrilh chuan u thani chu an hauh vak ka hlau ve a ni. Ka khawngaih ve deuh pawh a ni mahna, kan in tha en ve ta mai mai a, a nun dan erawh a sim chuang lo, ka pa rui a mu vat thin bawk nen zan rei tak tak thleng a bialpa chu a leng ta fo a, an thawm pawh ka hre leh zauh zauh thin. Engmah ka sawi ngai lo na in kan in zahawm lo ta lutuk chuan ka rilru erawh a ti na vawng vawng thin.Nei si lo, nghei chuang si lo a awm reng ta na na nachu zep reng theih a ni ta lo.

A pum lam chuan a thil tih chu a rawn hai lang tan a, a tlangvalpa chuan a nei leh duh si lo, a duh tawkin a chen a, duhtawk a ngah hnuah a thlauh thla leh si, tanpui a ngaih hunah a ensan a, mualpho na zawng zawng uThani chuan a phur leh si.Ka nî te ho chu an thinrim em em a, an fanu chu dah tha in ka pa thiam loh ah an bur bun vek a, demchitin rengin an dem a, ka pa thiam loh na chen pawh a awm ang, inchhung tha takin min uap se, office ban te hian zu in khawtlai lovin rawn haw vatthin se, kan in chu a zahawm ve anga, hetiang thil hi a thleng kher lo mai thei.

Mahse ka pa chu ka dem ve ngawt phal lo, engang pawhin awm se ka pa a ni miau a, u thani pawh a lerhin mipa a duh ve êm, a tuh rah a seng a ni ve mai.Kan ina a awm reng a rem ta si lo, an in lamah a haw leh a, keini chu kan pafa thum bawk chuan kanawm leh ta a.

Episode-5

Hmeichhe awm loh na a ni bawk a, inchhung te chua ni neih nuaih a, ka pa unaute ho lah chuan ka pa chu nupui nei leh turin an nawr reng bawk a. Ka pa pawh chuan a hnial reng thei ta lova, kan veng nuthlawi nu zuali chu a lo zei bawk nen ka nu thih atanga kum li hnuah chuan an innei a, mang lamah pawh ka la man chhin ngai reng reng loh nu hrawn chu ka nau nen chuan kan hrawn ve ta.

Ka pa nupui thar chuan fa pakhat kei aia nau hmeichhia hi a rawn chhawm lut a, naupang na na na chu kan inkawm nel mai a, unau tak tak ang chuan kan awm tlang ve mai a, kei erawh chuan ka pa nupui nu zuali chu ka nu tiin ka ko ve thei tlat lo. Ka sual vang leh ka rilru dik loh vang pawh a ni mai thei e, ka nu ti a ko turin ka nu din hmun luah zo thei in ka ngai tlat lo. Tun thleng hian ka nu ti a ka ko lo kha ka la inchhir ngai lo.Kan ina an lo awm tirh chuan min duat thei em em a,kan unau tan chuan nu thra tak a nih dawn hi ka ti hman a, chu ka ngaih dan chu a inthlak danglam hma khawp mai, thla thum awrh a liam tih ah chuan a zia a lang tan ta a, kan unau chungah chuan a thin a chhe telh telh a, ka pa awm lai erawh chuan nu zaidam ber a ni leh lawi si.

A fanu chu a vulh bik tulh tulh a, keini unau chu min thlahthlam tulh tulh thung a.Ka nau chu a damloh avangin ni hnih lai chu skul a kal tawh lova, a chau ang reng hle a, exam a hnaih tawh avangin ngaihtha vak lo chuan skul chu ka kalsan a, ka haw chu in chu a lo reh ruih a, ka nau chu a mah chauhin a lo awm a, khumah a lo mu a, a khawsik chu a khur hlak hlak a, ka nau damlo amahchauh a an lo len chhuah san vek chu ka ngaithiam lo hle a, ka thin a rim bawk a. Ka pa hnenah engkimka hrilh vek tawh ang tiin ka in sawh ka in sawh a.Ka nau chu ka bia a, min chhang mumal ta tlat lo, amit meng chu a â deuh ruai a, a kut te chu a khawr deuh a, a tin te chu a lo duk ruih a, ka mangang tak zet tawh a, "mama, ti khan lo awm la, ka nî te ka'n pun ange, lo thlaphang reng reng suh aw" ka ti a, mangang takin ka nî te in lam chu ka pan a, ka thlen chuan thil awm dan ka hrilh zung zung a, hmanhmawh takin damdawi in lam kan pan ta nghal a.Damdawi in kan thlen chuan doctor leh nurse te chu an lo fel em em a, min lo buaipuiin engkim a tulang ang an lo ti zung zung a, demna tur an awm lo, nachhawkna a an chiu hnuchuan a ziaawm ve ta deuh a, mahse, hma erawh a sawn chak vak lo a.A thisen test result chu a rawn chhuak a, malaria PF a lo ni a, ka hlauthawng tak zet ta, ka nau chuanmin kal san mai ang tih ka hlau hle a, a din hmun han en in beisei a sang vak bawk si lo.

A natna chuan a lo hneh tawh êm a tin ni. Paracetamol mum khat mai mai a lo chhawk chi zia zang a lo ni lo.Beiseina erawh tlem ka la nei a, a natna ber an hre tawh a, a damdawi dik takin an enkawl anga, a tha ve leh mai ang, ka nau tan chuan ka tawngtai mawlh mawlh a, Pathian chu ka ngen ngawih ngawih a, tawng mawi lo ni lo se, kha tih lai khan kangen bakah ka nau ti dam tura thu pê te pawh ka ang zawk mah a, a tur in ka tur a ni ber.

Beisei nei tak leh hlauthawng reng rengin kan awm a, sana chu kal muang ka ti em em a, zan chu ral thuai thuai se tiin zing khawvar chu ka nghak hlel em em a, manganna zan khaw thimin a nan chin a, lungngaihna mahni chunga a han tlak ve meuh chuan a mi deh a dang zar mai. Khua chu varin chhun eng chu nise, a tawrh a ziaawm deuh mahna. Chû ni thar lo chhuak tur chuan ka nau tan pawh chuan malsawmna rawn kengin atan damna ni te pawh a ni mai thei a sin tiin ka ngaihtuah a, kabeisei bawk a.Chu ka beiseina chu mit khap kar lovah um bo in a awm a, ka nau chu a thawk a buai ta tlat, a kaw tawp tak meuh ah kan ding ta. Doctor leh nurse te chuan an theihtawp an chhuah chungin a nunna chu an chhan zo ta lo. Beiseina tlem kan lo neih ve chu sarah a zam ral ve nghal a. Ka nghilh dup a, ka tuar thiam thei thlawt lo.chuti mai a liam turin ka phal lova, ka la inpeih hek lo."I nau chu i nu kiangah hlim takin a awm tawh dawn a lawm." ti a min hnem a min tawrh pui tute chu ka tan hmelma an ni a, an mi hnemna tawngkam mawi tak te chu ka tan chuan thu thinthawng, tawng huatthla la ah an chang zo a, min tawng thlamuanna te chu ninawm mai an ni a, an zinga nun hman a awm ve pawh ka peih meuh lo.

Hmangaihtu neiin ka in hre lova, mal riau in ka in hria a, he khawvelah ka nu tih tur ka nei tawh lova, mangan changa min thlamuantu ber leh hmangaih taka min enkawltu nu ka nei ve tawh lova, he lei a ka dam chhan ve ni a ka ngaih ka nau, ka neihchhun in min boral san ve leh ta si.Dam chhan neiin ka in hre lova, dam bik nih chu nuam ka ti lova, nun chu nuam ka ti mawlh lo. Thih chu ka tan nuam ber tawh zawkin ka ring a, ka nunna hlu tak chu ti tawp turin ka rilru ka siam fel ta a.

Beiseina reng reng nei tawh lova beidawnna in a hneh tlat tawh, mi dawihzep ti a ka lo ngaih thin mahni in tihlum te chu an dinhmun ah ding a, an chan ang ka chan ve meuh chuan huaisen ka ti tharta riauva.

Episode-6

Ka nunna ka tih tawp hmain ka nu leh ka nau thlan chu vawi 1 tal hmuh leh hram ka duh a, chumi zawhah ka chhungkhat lainate, ka thiante leh ka thil neih ve te kal san in he khawvel hi ka mangtha tawh ang a, ka chatuan hmun tur lam ka pan tawh ang.Thlanmual lam chu ka pan chhat chhat a, a lo reh ruih a, thla eng chuan chu thlanmual reh tak chu a ên ruih a, ka nu thlanah chuan ka thu a, lunglenna in min zem a, chhungkaw kim a hlim taka kan awmho lai te ka ngaihtuah a, hun kan lo hman tawh mual liam ta te chu mitthla ah a lo lang zut zut a, lunglenna chu khawharna in a rawn zui a, dan rual lovin ka mittui chu a rawn luang zung zung a.Thli fim a tleh heuh heuh a, arsi lang pe tuarh te chu ka mit ah chuan an mawi thar ta riau a, thla eng lawm a rannung hram ri chiah chiah te chu rimawi an chang zo a, Pathian thil siam ropui zia leh a them thiam zia te chu ka hre thar uaih uaih a.

Thlânte chu ka thlir kual a, lungduh mual liam ta te ka ngaihtuah a, thenkhat dam duh in an theih tawp chhuahin an in enkawl a, ka nau ngei pawh kan theih tawp tak meuh meuh kan chhuah a, mahse, a tana hun ruat chu kan ti danglam thei si lo. Thenkhat lah Pathianin nunna hlu tak min pek chu mahni ta emaw tiin an duh hunah an lo ti tawp ve mai bawk a. Kei pawh chung ho zinga tel ve tur chuan ka inbuatsaih mek chu a ni si a. Ka nu leh ka nau chuan ka thil tih tum chu engtinnge an ngaih ang le, tunah te hian min lo thlir reng a ngem le.Kan chhungkuate, ka nau thihna te chu ka ngaihtuah zel a, lunglenna leh khawharna chu thinrimna in a rawn thlak a. Ka nau boralna ah chuan ka nu hrawn chuan mawh a phur a ni. Ngaihsakin lo enkawl tha se, a hun takah a natna kha enkawl nise, a boral bik lo ang.kha thihna kha atana ruat a ni lo. Keimah leh keimah chu ka inhrilh nawn mawlh mawlh a.Chuta karah kei leh zelin an lawmna famkim nan ka inthiar fihlim san ang maw!...teuh lo mai.

Kei lehzel ka awm loh te chuan hnar a hlit phawi ang hlauh an ni dawn a sin. Ka nu te nena theih tawpa kan lo sual chhuah ve kan in leh lo chu chuti mai a awlsam chuan an pum bilh bik hauh lo ang. Ka kut chu ka hum ruh a, thinrim avang chuan ka ha changchu ka thial bap bap a. Ka in awh hlum na tur atanaka hrui ken chu ka lak atanga hla thei ang ber ah chuan ka vawm a.Ka nu leh ka nau chu ngaihdam ka dil mawlh mawlh a, ka nêp zia te, ka lo dawihzep zia te, an tana tih sak theih ka neih tlem zia te chu ka hre chhuak uaih uaih a. Thlan lung ngheng chuan ka lo muhil a.Thing delh loh lung delh loh ta na na na chu ka sei lian chho ve zel a, puitling ti a chhal theih ka ni ve ta a, college hial ka lo rap ve ta a, ka nuhrawn pawhka chungah a lang a pau in a sual ngam tawh lova, a fa bik chu la duat bik viau mahse eng teh ual ah ka ngai tawh lo. Mahni a in enkawl thei ka ni ve ta bawk a.

In khata cheng ho reng ta chu in hauh chang leh inhmuh thiam loh chang awm thin mahse reilote ah kan lungawiin kan theihnghilh ve leh mai thin. Ka nu leh ka nau min boral san ta te ka ngaihna chu a reh ve hret hret zel a, engemaw chang chuan ka la ngai veng veng thin.Kawl bul chu a rawn sen phût a, kan college sihhmui a kan picnic tur chu ka helhhawlh a ni teh chek ang chu ka muhil hlei thei tawh der lova, mut luih hram ka tum a, ka harh tulh tulh zawk a, mut thilh leh tum zui ta lo chuan ka tho a, vai pathian thawh hma chuan zing boruak tha chu ka hip ve hman teh mial a.Ni chu khawchhak lam tlang kar atang chuan a rawn dak dek dek a, chhun lama chaw zawng chi hozingah chuan chawngzawngte chu an lawm fal bik amaw tih mai turin an chiar noh noh a, reilo te ah hringfate tan malsawmna thlen turin ni chuan van sang lam a pan ding zel a.Picnic na a kal vwi 1 na tur a nih avangin ka phur em em a, chubakah, class kal reng a ninawm bawk nen han in tih thawvenna hun tha kan nei chu kan phur tlang ve em em a, ka helh hawlh avang chuan chaw pawh ka ei hlei thei meuh lova, ka kham vat a, ka inbual sawk sawk a, ka in siam nghal a. Darthlalang hma ah chuan kan inthlek vang vang a, ka lungawi thawkhat ve viau a.

Zan lamah ka pa bike ken ka dil fel diam tawh avang chuan chabi ka la, ka chhuak nghal a, ka chhuah dawn a ka pa'n "fimkhur rawh w.i chesual a palh hlauh ange." a tih pawh chu ka chhang hman tawh lo. Ka thiante nen innghah khawmna hmun tura kan tih chu ka pan ding nal nal a.Chu ni chu ka hmangaih hmasa ber ka tawnna tur ni a ni ang tih ka ring pha reng reng lova, rin ngaihna lah ka hre hek lo.

DIARY ~ EPS-1-3

By ~ Zet Khawlhring

Episode-1

Ka zun chhuak chuan min ti harh a, light ka on a, banga kan sana tar chu ka melh zauh a, a ban tawi ber chuan dar 1 a lo kawk va tawh a, zung turin bathroom lam ka pan a, ka let leh chuan bawihtei room light lo la eng chu ka hmu a,' I off theihnghilh leh tawh ni maw' ti rilru chungin off tur chuan ka luta, thosilen pawh a lo zar lova, ka zar sak zawh chuan puan a lo sin that loh vang chuan sin that tir ka tum a, lehkhabu chhah/lian vak lo hi a lo kuah a, a bianga a mittui luanna lo rang niaih chu ka hmu a,a mit te chu a bui lak a, a sam pawh chu a thur bama, a tap nasa a ni tih chu hai rual a ni lo.Second reilote chhung chuan engvanga tap nge ni ang, kan mut hma lawk lahin hlim takin a la nui ar ar si a, harsatna a nei em ni le, kan mit hmuhah a hlim thei em em si a, kan hriatpui si loh hian rilru natna a nei zawk em ni tih zawng zawngte chu ka ngaihtuahna chuan a dap kual hman vek a, thil 1 kahre chhuak a,a lehkhabu kuah chu a pa(amah hringtupa)in kan pa hnenah lo pe tura a tih a pek tak kha a nih ka ring nghal a, a chhungah engnge in ziak tih hre chak taka keu ka tum lai tak chuan a lukham hnuai a envelope lo lang chu ka hmu a, ka la a, ka chhiar hmasa ta zawk a.

Ka hmangaih ka fanu,He lehkha chhiar thei tura i nunna zuaha a la awm avangin Pathian hnenah lawmthu awm rawh se.I piancham hi i nu nen kan lawmpui em em che a, kan lei taksa i kiangah awm tawh lo mahsela kan hmangaihna che chuan a chenchilh reng che a, tluang taka i nun i hman a, i hrisel theih nan kan dil sak reng che a nia.

Ka fanu, hetia i nu nena nangmah chauh a kan kal san ta mai che hi hriat thiam loh chang i ngahin ka ring. He leiah hian kan duh dan leh kan remruat angdiak diak hian kan awm thei lova, khuanu'n kan tana a ruat hi kan pawm thiam a tul zawk a lo ni. Chuvangin, i chunga thil thlengte pawm thiam zir la, i nu leh pa nangmah chawm sei lian tu che kha zah tak leh hmangaih takin lo enkawl la, leia i Pathian hmuh theihte an ni tih lo hre reng ang che.He lehkha ka ziah lai hian natna khumah ka mu reng a, thui tak han ziak turin chakna ka nei tawh lo, natna chuan ka taksa ei chhiain thihna chuan min lem mek a ni, rei ka dam tawh dawn lo tih ka hria, . .

Bawihte, tih sak theih che ka van nei tlem tak em. . i pa nih hi tling lo hle mah ila nang ka fanu i ni hi ka inchhuang tak zet a ni. I tan ro sum leh pai hnutchhiah tur che engmah ka nei lova, ka neih chhun ka diary i tan ka hnutchhiah a, kim lo mahse kan chhungkaw chanchin chu i hre thei ang. I nu nen kan hmangaih em em che tih hi i hre reng dawn nia.Ka chau tak zet ta, hei chauh hi ka chah leh duh che. Thihna leh natna awm tawh lohna hmunah i nu nen kan lo nghak reng ang che. Chu hmuna in tawk khawm leh thei turin inbuatsaih la, Pathian duh zawngin i nun hmang thin ang che.

Hmangaih em em tu che,I nu leh pa.....
Ka chhiar zawh chuan bawihtei chu ka en a, a lungchhia chu a la in hnit faih faih a, chu lehkhabu chu chhiar tumin ka keu a, a phek hmasa berah chuan bawihtei nausen lai leh a nu leh pa an pathuma an thlalak chu a lo inbel a, a hnuaiah chuan hlimlaini tih a lo in ziak a, ka thlek vang vanghnu chuan a chhung thu chu ka chhiar tan ta a.

Episode-2(a fiah zawk theih nan darkar 10 hmalam kan sawi lawk ang e)

Ka purunsen zaiin ka mit a ur thip avang chuan ka mittui a tla lek lek a, insût pah chuan ka mit chu ka kawr tlang hmawr chuan ka hru nawk nawk a, men a tih nawm phah deuh chuan ka hria.

Sana chu ka en a, tlai lam dar 3 a lo ri dawn tawh a, ka chawhmeh siam chu a hmin leh hmin loh ka tem kual dan dan a.Ka fanu chuan a piancham lawm nan a thiante chaw ei ah a sawm a, an rawn thleng tep tawh in karing a, an lo thlen hma a lo in peih hman hram chu ka duh a, ka theih ang tawkin ka hmanhmawh ve a, lum ka tih tak deuh avang chuan ka chalah chuan ka thlan a rawn bawl triam triam a, ka kut chuan kahan hui pawk a, chutih lai chuan kawtah chuan motor horn a rawn ri a, pawnah ka chhuak nghal a, kan pa chu garage ka hawn sak a, motor a dah fel hnu chuan kan inzui lut nghal a.Kan pa chuan,' bawihtei te an lo la haw na nge, an lova thleng har ve' a ti a.'an lo thleng ve tep tawh ang' ka ti a, ka eirawng bawl a lak lawh avang chuan choka lam ka pan san a.

Eirawng bawl ka peih hnu chuan bawihtei leh a thiante ho chu an lo thleng a, khua a lum bawk nen fridge a ka thei tui dah vawh chu ka in tir a, tui an tih thu an sawi tliar tliar hlawm a.A thiante ho haw na tur a hlat deuh hlawm avangin an thut hahdam hnu chuan chaw ei ka siam sak a, an puar tlang ve viau turah ka ngai. An ei tlem hran lo in ka hria, chawhmeh ka siam uluk bawk a.A thiante ho an haw fel hnu chuan present an rawn ken sak ho chu kan hawng a, kan hlim tlang hle a, kan hawn zawh hnu chuan a pain kawr thar a lei sak chu a han ha chhin vel a, a hlim hle a, a nui sen sen reng a, a pa nen erawh chuan min helh kam tlat tu a awm a, chu chuan kan ngaihtuahna a hruaipeng a ni teh chek ang chu ngawi rengin kan lo thlirleh ringawt thin.

A pa chu roomah kalin uluk taka paper var a intuamhi a rawn keng chhuak a, han en mai pawhin lehkhabu a ni ang tih chu a rin theih a, chu thil chu bawihtei a pa in(amah hringtu pa)a thih san hma lawk a kan pa hnenah 'kum 18 a tlin hunah i lo pe dawn nia' tiin a chah a, a tuk lawkah a boral ta nghe nghe a.Bawihtei hnenah chuan a pa chuan" hei hi i pain a boral hma lawkin min pe a, kum 18 a i tlin huna lo pe tur che in min ti a, nakinah i hawng dawn nia." a ti a, mu turin mahni room lam kan pan a.

Bawihtei hi a hming tak chu Lalmalsawmi a ni a, a pa(ka pasal) nen hian a hming pawhin kan ko phal ngai lova, kan duat em em a, a mah hi a ngo in a hmel a tha a, kan hnena faktu pawh an awm leh nawlh thin a. A ruk tak chuan kan chhuang ve em em thin.Kan venga an rawn awm tirh hian kan thenawmah mi inhnuai luahin an rawn awm a, a pa hi pa fel leh tlawmngai thei tak a ni a, kan pa nen hian an inkawm ngeih hle a, an inah a leng fo a, chapo thu ni lo se, kan dinhmun a inthlauh deuh vang nge kan inah hian an rawn chuangkai tam lutuk lo, pa inthlahrung tak a lo ni bawk nen.A tawi zawngin sawi ta mai ila, chhungkhat laina anneih awm kan hre lova, nupa inngeih tak an ni a, tawng mawi lo ni lo sela, rethei tê mah nise, an hlim dun em em thin.

An pa zawk hi a hnathawhna a a chetsual avangin hnathawk thei lovin a awm a, an nu chuan rim taka hnathawkin an pafa chuan a chawm a, a hriselna in tuarin a pasal leh a fanu chungaihtuah em em in a boral san a, hetia eizawngtu berin a boral san takah chuan yma leh thenawm khawtlangin theihtawpin an chhawm dawl a, an khawsa ve naw naw a, tun hnu a ka ngaihtuah leh hian yma hi a lo ropui in mizo nih hi a lo va han nuam tak em ka ti thin.Bawihtei pa pawh chu a chet sualna avang leh an nu boral tuar nen a hriselna a pan ve tial tial a, a taksa a chaklo in damdawi inah hial dah a ngai ta a,kan pa nen hian inkawm ngeih tak an ni bawk nen theihtawp in kan enkawl a, Pathianin kan tana a ruat ah kan pawm tawp a, kar 2 damdawiin a a awm hnu chuan paper vara thil tuam hi kan pa hnenah a pe a, kum 18 a tlin huna lo pe tur leh lo hawng miah lo turin a intiam tir a, a tukah chuan a fanu ngaihtuah em em in a boral zui ve ta a.A fanu bawihtei hi kan kutah a dah a, tha tak leh hmangaih taka lo enkawl turin min ngen a, fa kan neih theih loh avangin fa tak tak angin kan en a, a ni ai hian mahni fahrin ngei te pawh kan hmangaih thei chuangin ka ring lo. A ni pawh hian a nu leh pa dik tak kan ni lo tih hre mahse, a tet te atanga enkawl kan ni bawk a, nu leh pa tak takin min en a, thu a awihin min hmangaih em em a, han vuina tur leh sawi selna tur pawh ka nei ngai lo.....

Diary chu ka chhiar a, thawnthu bu te pawh a ang ka ti lek lek a, hla thu te a awm leh zauh thin a, lehkhathawn a in zep tel zauh bawk a, a chhung thu chu chhiar tan rawh le.

Episode-3

Ka pa ka chhun avangin thil ka hre rei thei em em a, kum 10 mi lek ka nih laia kan in a mi an lo tlan khawm hum hum kha ka la hre reng thin. Kan pindan bangte chu an rawn thiat mawlh mawlh a, bungruate chu pawn lamah an thiar chhuak zung zung bawk a, inchhungah chuan YMA thutthleng anrem tlar put a, kawmchhak tualzawl a ka nau te ho nena kan infiam chu kan chhuk thla ve a.Kan kawt kan thlen chuan ka nî in min lo hmu a, thenawmte inah min kai lut vat a, kan in tih balh deuh avang chuan min silfai sawk sawk a, min silfai zawh hnu chuan ka nu thih thu leh damdawi in atanga an rawn phurh haw mek thu min hrilh ta a.Kei chu ka lung fing tawh deuh bawk nen ka mittui a tla a, sawi tur hre lo chuan ka ngawi ta reng a. Ka nau erawh chu a la mawl thelh thelh khawp mai a, unau in chhang bung chiah ni mahila kan inkar ah kum thum lai a tla a, unau pahnih chiah kan ni bawk a, kan in ngaina em em a, skul chawlh hi chuan kan inzui chawt thin. Kan thenawm naute nen chuan an inkawm hlim leh thei mai a, ka nu vanram kai leh kai loh turah an inhnial laih laih a, thihna awmzia an la hrethiam ve tak tak lo.Kan in a leng lo chuan mi an lokal khawm a, a then an titi a, a then an zai bawk a, ka nau chu a muhil tawh a, kei pawh chu ka mut chhuak chu ka bu lak lak thin a, mu tura min tih pawh chuan ka duh lova, ka nu ruang kil in ka thu ve tlat a, ka nu unau te leh ruang kil thenkhatte chu an tap rawih rawih a, ka papawh chuan a mittui a hru zauh zauh a, a insum hram hram tih chu hai rual a ni lo.

Tun hnu a ka ngaihtuah leh hian ka pa tana a lo nat tur zia leh a lo pa chan zia ka ngaihtuah a, tluk lo ka in ti hle thin.Ka nu chuan lungngai hmel em em hian min lo en a, a mittui a tla zung zung a, ngatinge ti a zawh tum in biak ka tum a, ka tawng chhuak thei reng reng lova.Khuangte leh khuangpui in thum rawn tluk tluk chuan ka mu thlu chu min ti harh a, ka mumang a lo ni reng a, ka nu chu ka ngai zual ta em em a, ka mittui a tla zung zung a, ka nu chu ka bulah awm reng mahse nunna a nei tawh lova, mitthi lei hnuai thlan khur chhunga phum mai tur a ni tawh si.A hmel dang vek tawh chu ka en a, a biang chu ka khawih a, lumna reng reng nei lo hian a lo vawt vek tawh a, biak pawhin min chhang tur a awm tawh lo.Kan inchhung chu a ruak huai in ka hria a, ka nau nen chuan he khawvelah KA NU ti a han koh tur kannei ve ta lo.
Ka nu, engngatinge min kal san, mama nen hian min khawngaih lo vem ni. I tel lovin engtinnge kan lo awm theih ang, mama lo harh hunah 'â nu khawnge ' ti se engtinnge ka lo chhan ang,ka nu lokir leh rawh...Ka mittui a luang zung zung a, ka chhungril a na a ni, ka rum a, ka tap a, ka lo muhil zui a.Ka harh leh chuan ni a lo chhuak siar siar tawh a, a then an haw a, a then an lokal hlawm bawk a, ka nu vuina ah chuan kan in a lenglo leh pawn lamah pawh thutna in chan lo khawpin mi an lokal khawm a, kan inchhung khat vekin nu leh pa thu mahse ka nu a tel ve lo.

Ka nau mama chu kan chhung te ho chuan thil te leiin pawisa te an pe a, nuam a ti em em a, ka nu thihna chu a hrethiam ve mawlh lo. In leng te tin in chhungkhat laina te haw hunah engtin tak a nun khua hmang ang maw. Ka nu thihna in a nghawng chu a la tuar ve dawn chauh si a, nu te ngai rual lek nu tel lova zan pawh muhil hlei thei lo chu naupanglawm nepnawi vel mai mai chuan rei a hnem in a ti hlim reng thei dawn si lova.

Ka nu vuina programme an hman zawh chuan thla te kan la a, thlan mual lamah ka nu ruang awmna kuang chu an zawn a, kan inkawt a zamzo par chu ka thliak a, kuang zawn tute chu kan zui ve hnak hnak a.Ka nu thlan an vur zawh chuan zamzo par ka thliah chu ka dah a, ka sweet ah pakhat leh biscuit ka lo ah chu thlan vur na lei thar sur ah chuan ka phum a,ka nu ei ve atan ka ît em a ni. Ka nau chuan ka tih ang chuan ti ve in eitur a neih te chu a phum ve a, ka nu ruang an phum zawh meuh chuan ka nu thihna chu a hrethiam ve tan ta.

" Â u, Â nu hi a lo tho tawh dawn lo a mi."Chhan a va han har tak em!. . . ka nau kut chu ka vuan a, lungchhia avanga aw tham triak chuan," Aw, lo tho tawh dawn lo, vanramah a awm tawh a lawm" ka ti chhuak thei hram a.

Kum khua a ka nu a zal tawh na tur thlan chu ka en ngawih ngawih a, he khawvela in hmu leh tawh ngai reng reng lo tur chuan ka mangtha a, in lam pan chuan kan haw ve ta a.

THUTIAM

Hmangaihna hi a chang chuan kan tah pui bawk bawk a,a chang in kan hlimpui em em thung si,eng hi nge dik a dik lo tih chu tu nge sawi thiam teh lul ang? Nunrawng tih chang nei mah ila,hmangaih na chu min suih zawm tu tha tak ani lawi si,hriat thiam avan har teh lul mai em...

In hmangaih tak te,an hlim na te hian kum tluang a daih chiah em le..? thu chu kan tiam a kan bawh chhe leh mai bawk thin a,hei hi chu a fair thlawt lo,midang hnen ah thu i tiam tawh anih chuan chu ithu tiam chu i ti pui tling ngei ngei tur ani,chu ti lo chuan engtik ah mah aring tawh ngai lovang che.
Mi thinlung i hliam sak hian a tuartu tan anat zia leh hrehawm zia i chhut pui ngai em?nge i hre lo lui der tlat thin zawk? Mi i hliam avang khan midang arin leh na tur ah harsat na i siamsak in,mi rual in ke pen pawh harsa ati thei asin,chu chu i dawn ve ngai miah lo vem ni...?

Biang ah mittui luanglo mahse thinlung erawh a țap thung si,nui ve mahse chhung ril a nui silo,eng kawng pawh zawh in ti se hliam anih na chuan anun ram ati chau ngawih ngawih a,anih tur ang ani phak lo fo thin asin..

A hmel leh awm dan ah thup tum ngar ngar thin,
mahse lo hre tawk an lo awm zel si,chu chuan mi dang kangkai in diriam leh nuihsawh a hlawh phah asin,a chhan chu nang arin em avang che kha ania,nang lah chuan engmah i hriatpui hauh silo. Chung tawk tawh te chuan hlim ni nge rei zawk tah ni tih pawh an hrehrang ngam meuh tawh thin lo,a lak ah i rinawm thei dawn lo anih chuan thu tiam pui lo mai ta che......a hliam i tuam sak leh ngai si lo..

Nangmah avang in nun beidawng an awm belh phah thei tih kha i dâwn hmasa ngai miah silo, sex hi hlim na emaw i tih tlat kha ila hria em..?ani ber lo asin,nang hmeichhia,mipa te lak ah easy lutuk in awm tum lo hram ang che,nang mipa pawh i hmuh apiang emaw i kawp apiang sex hmanpui tum kher suh,tlai luat te hian pawi na a nei ania,i tah vawng vawng ni alo thleng palh hlauh dah ange..

I tih sual siamtha leh tur in hun aduh rei teh mai ania..
Suangtuah na tih puitlin kher hi i tan atha kher lo thei vei zui lutuk suh,kawppui te rilru thawi dam dan tha ber chu amah lo midang ngaihsak lo la,ahlim ani mai...in ngaihsak na hi hringnun hian a mamawh ngawih ngawih si a.....
I kawppui i ngaihsak tlat chuan engtin nge arin loh theih teh lul ang che,a tawp ber ka sawi duh chu,in ngaihsak na tel lo chuan hmangaihna anung thei lova,chu hmangaihna chu chawm lian tur chuan atak a ilan tir a tul fo thin...vawikhat tih sual in nun ati chhe thei tih hria in tih sual tum ngai suh ang che...

KIMKIMI

-Zama khiangte khuangleng

Fur a intan tawh; ni khat chu thawmhnaw tihnâwng tham lek hian ruah a sur cherh cherh a. Nihliap ka ken loh avangin ka bag chhipchhuanin kal luih mai ka duh a, ka khawmuan chuan ka tlai dawn tlat a ni. Tlan mai tuma ka insiam rem lai chuan vantirhkoh aw ni hiala mawi hian ka hming ngeiin min rawn ko a. Vantirhkoh aw hi ka hre tawh a ni lo; mahse, lei mihring hmeichhe dangte aw ai chuan ani aw hi chu a mawi tlat a ni.
Min kotu lam ka va hawi chuan a aia mawi awm tawh lo tur hian Kim Kimi chuan min lo nuih a. A nihliap âng chhungah chuan ka tan hmun a awm tih ka hre thiam ve nghal mai. Hnial ka tum lo va, ka phal hek lo. Hemi ni zet hi chuan Chanmari leh kan school inkar hi hnai ka ti ngei mai. Kawngah chuan lehkha zir chungchang te, kan Principal chanchin te, pawl sawm kan zirna leh kan result te kan inzawt tawn a. Kan vawi khat inbiakna ni mah se, kan innelin kan inpawh nghal em em a, kum tam tak lo inkawm tawh ang mai kan ni. Science leh Arts building a hran avangin kan building lamah ka pheisan ta a. Tlaia haw rual tura min sawmna chu, a tawngkam tha chauh pawh lo ni se, khami ni kha chuan nghah ka tum hrim hrim. A uang bik lo a ni ang, class an ban hma zawk avangin min lo nghak a, hawn kawng pawh ni dang zawng aiin a tawi ka ti daih. Hemi ni atang hi chuan zing tin Chanmari-ah kan innghak a, tlaiah kan haw rual leh thin. City bus te chu tawt takin a tlan tih kan hre chang tawh lo va, ruah a sur phei chuan nihliap pakhat hnuaiah lungrual takin kan inkuah haw thin. School chawlh te hi kan tan chuan a hrehawm mah zawk a, kar tawp chawlh hi rei kan ti dun thin khawp mai. Chawlhni te hian kan inlen pawh a, a nu leh pa, a unaute paw’n min hre thiam tawh hle. Inrinni bazar hi kan pahnih tih turah an dah tawp tawh a, keini tan hnial phal rual a ni lo. Aizawl bazar leh Millennium Centre te hi kan khawvel par chhuahna hmun a ni a, khang hun lai khan hetiang hian hrehawm ka insiamna tur a ni tih kan hre thiam pha lo.
Kim Kimi hi tawng tam leh harh tak ni lo mah se, nuih peih tak a ni a. A nuih zawnga a ha var rual tha tak lo lang leh inthlahrun hmel taka a biangsum lo lang thin hi a duhtu tan chuan tluk chhiatpui tham ni hiala mawi a ni. A pumrua tê fel thlap, pian inrem khawm fuh tak leh a nungchang ngainatawm tak hian amah a timawi a. A inrin tawkna ringawt pawh hi ngaihzawn tham niin ka hria. A sam nung tak hian a mitmeng mawi tak hi a chawimawi a, duhawm lo lai reng kei chuan ka hmu ve lo a, ka hmu phal hek lo. Sawi vek dawn ila ka sawi kim sêng dawn chuang lo va, kan hlimnate kha ka sawi chhuak pha hek lo ang. A châng chuan office-ah zirtirtu-te’n min hau a, zirlai nih laia inngaihzawn that lohzia te min hrilh a, an thin kan tihrim zual chang phei chuan classroom-ah min hruaiin kan thiante awm laiin min hau bawk thin. Mahse, chung te chuan kan inzawmna a suih nghet zual zawk a, thihna chauh lo chuan min pawt then dawn tawh lo ti ila kha tih hun laia kan inzawmna nghehzia sawina’n a tawngkam hi a la nghet lo ka la ti zawk hial. Kan thinlung hi pakhat a ni tawp a, kan inlungrual a, kan inhmangaih tak zet bawk. Thla eng lawma haw nachang ka hriat loh zan te, Lammuala inkhel kan en tuma kan hlimzia te, an ina chaw ka ei tûka a pa thu min hrilh zawng zawng te leh kan thawnthu pum mai kha sawi vek sen a ni lo ang. Kan thawhthu tawp tâk dan erawh sawi lan ngei a ngai si; hetiang hi a ni.
December thla chawhnu lam a ni a, a boruak pawh Krismas tawh tak a ni. Bazar a lûnin zan lamah pawh dawr inhawng an awm a. School chawlh kan neih tirhin ka hawn duh tur chu ka lei fel vek tawh na-chungin Kim Kimi’n haw lo tura min chelh nat em avangin, ka ticket tum hnih ka cancel hnuah kan khaw lam pana sumo chhuak hnuhnung ber turah ticket ka la tha leh ta a. Ka haw dawn zan chuan Kim Kimi nen Millennium Centre chunga dawr hran an siam, zan lama an hawnah kan va kal a. Hemi zan hian hun dang angin kan nui tam lo. Kan inkai chawt a; coffee te kan in dun bawk. T-shirt hring min lei a, kei paw’n T-shirt sen, ka rawng duh ber ka leisak ve a. Chu chu ha haw nghalin, inhmeh zawk nih kan inchuh der te chu kan hlimpui ve khawp mai. Kan ina ka thawmhnaw min siam felpui zawhah an inah kan phei leh a; kan sawi lo na a, mut hma chu kan tum lo. An tuala thing buk hnuaiah chair la chhuakin kan thu dun a, vawi thum ngawt chu haw ka tum a; mahse, kan inthlah thei lo. Duhthawh takin kan infawp a, kan inkuah a, a tawpna a awm thei tak tak si lo. Ka thlah thei lo a, ani pawh chutiang tho chu a ni. A mittui lo tla te kha awle mittui a ni lo tih ka hre chiang a, tuna ka ngaihtuah leh phei hi chuan haw kha eng vanga lo tum lui tlat nge ka nih ka hre thiam bik tawh lo. Pathian remruat ka tih dawn chuan kan chhiat nan Pathianin rem a ruat ka ring thei si lo, tu nge ka dem ang tih pawh ka hre thiam lo.
Zing dar khat velah Kim Kimi nu’n mu tawh tura min tih avangin an in lam chu hreh em emin min pansan ta a. A pindan puan zar kêu chunga ka kal liam tur min thlir te chu ka hmu ru reng nain ka hawi let ngam tawh lo. Amah ang bawkin hawsan ka hreh a, a kianga awm ka ning thei lo a ni. Krismas leh kumthar te chu nuam takin ka hmang thei ta reng reng lo. Krismas tuk atangin Kim Kimi chuan ka phone call a la duh tawh lo a, mi dang phone atanga ka tih paw’n ka aw a hriat chuan a dah hmak thin. A chhan min hrilh bawk si lo, insawi fiahna hun reng reng min pe ve lo te chu ka thin a rim a; mahse, ka thinrim ti reng chung siin ka haw thei chuang si lo. Kum a thar veleh Aizawlah ka chhuk nghal vat a. Amah hmuh vat ka duh avang zawka ka chhungte bulah pawh lehkha zir chhuanlam ka ni a, anni paw’n min hre thiam takin min chhuk hmatir kha a; a tak takah chuan lehkha zir chu a lang lo hrim hrim. Kim Kimi te in ka kal leh hmasak ber ni chuan an kawngkhar ka kik a, a nu’n min rawn hawn a, ‘Kim kimi a damloh thu leh min hmuh duh loh thu’ min hrilh a, kawngkhar a khar leh nghal hmak. A awmzia ka hre lo viu nain Kim Kimi nu hmelah khan khawngaihna hmel leh lungngaihna inchawhpawlh ka hmu a, thinrimna reng reng a lang lo. Mahse, ka mipa thinlung sak a rawn thawk ve ta. Min hmu duh lotu chu eng vangin nge ka hmuh bik ang, ka tihsual sawi tur a hria pawh a ni chuang si lo. Min be duh lo ve tawp a, eng nge thlenga eng nge a tawn sawipui theihin a awm duh bawk si lo. Kar khat zet chu zan tin ka ngaihtuah a, ka muhil thei ngai lo. An ina va kal ka tum a, ka chhuah vek tawh hnuah te ka let leh thin. Ka mu thei lo va, ka theihnghilh thei chuang bawk si lo. School kan lut; kal chakna ka nei ngai lo a, ani lah chu school pawh a lo kal ngai tawh si lo.
Kar hnih a liam hnu chuan Kim Kimi te in chu ka pan leh nge nge a; mahse, thil danglam eng mah a awm lo, A nu bawk khan min hmuh duh loh thu min hrilh leh a, kawngkhar a khar leh nghal hmak. Luhlul chhuahin tualah darkar khat aia rei ka awm a; mahse, eng mah a danglam chuang lo. A thiannu hnen atangin Kim Kimi chu a damlo tak tak tih ka hria a, a cher tawhin amah pawh a chawrche tawh a ni awm e. chaw a ei ngai lo va, a muhil tlem em em a, a harh chian vak loh phei chuan ka hming a lam nasa thin niin a sawi. Mut hmunah te, khawi hmunah pawh chawl lovin Kim Kimi nena kan inkar chu ka ngaihtuah zui a ni ber mai. Eng vanga an inah chuan lut lui a, a nu tal chu thil awm dan zawt chiang ngam lo nge ka nih pawh ka inhre chuang si lo. Kawngkhar min khar hnan khan eng vangin nge ka haw leh mai thin. A nu tal chuan eng emaw chu min hrilh ve tur a ni dawn lo’m ni. Chuti lo zawng chuan; kei thingtlang tlangval ve mai hi an chhungkua chuan an fanu tan min iai thar a, ruahmanna dang an nei zawk? Keimah avangin Kim Kimi chu an khar khip ta nge, thawnthua an ziah thin angin Kim Kimi chuan natna a vei a, min hmangaih em avangin min then a duh! Ka ngaihtuah tam leh ka buai a, ngaihtuah loh ka tum nasat leh ka buai zual tho bawk si. Awm dan ka thiam seng lo a, awm loh ngawt dan a awm chuang si lo. Ka beidawng leh kan awm dan ning tawh lutuk chuan Kim Kimi emaw a nu emaw chu thu chiang ka zawt tawp ang a, min hrilh thei lo a nih chuan anni aia mak sakin ka che ve ang tiin thutlukna ka siam ta ngawt a. February thla inrinni vawi hnihna chiah a ni, kar hnih zet chu Kim Kimi chanchin ka hriat lohna a ni ta. Ka insiam mawlh mawlh a, a T-shirt hring min leisak kha hain, ka kekawr zinga aman inhmeh min tih thin ber secondhand jeans ha bawkin converse dum ka bun thung. He ka dress hi Kim Kimi duh ber a ni. PWD penga ka chhuk thlak lai chuan Kim Kimi nu hian ka darah a rawn kuai her sawk a, a hmanhmawh hle a nih ka ring. restaurant-ah kan thu lut a. Tawng hmasak kan hreh dun khawp mai. Zawh duh tam tak ka nei chungin sawi hmasak tur ka hre bik chuang lo. A ip chhunga lehkha khawr tawh tak chu a phawrh chhuak a. Eng dang sawi chuang lo chuan lehkha chu min pe leh ngawt a. A ngaihna hre lo fea lehkha leh amah ka thlek tawn zak zak hnu chuan, chu lehkha chu ka chhiar ta a.
Duhtak
Nang nena hringnun kan hman dun hlimawm tak tak atanga min kai hrang a, thihna lui lama min hnuk luttu hi khawngaihin lo ngaidam hram ang che. Kei chuan ka ngaidam thei ngai dawn si lo va.Rûm leh tahna khawvela min nuihtir a, lungngaihna khawvela hlimna min petu i hmangaihna kha tunah chuan dawng tlak ka awm ta lo. I pangpar mawi tak, ni tina i chawm, tui i pek thin hi khawngaihna leh lainatna tel miah lovin min thliak a, par chhuah leh thei tawh ngai lo turin min siam a, i enkawl tlak ka awm ta lo. A... ka sawi tawh mai ang, hreh luat vanga thih theih chu ni se mual ka liam tawh tur. Eng vanga he hringnun hi ka chunga nunrawng bik nge maw a nih le? Mi tinin Isua piancham lawm tura an sum leh tha, an thinlung an hlan zan khan kei chu ka thianghlim vena te tihbawrhbanin a lo awm asin. A hming leh nihna eng mah ka hrilh ngam lo che, a chhan chu min hma-ngaih êm vanga phubâ i la tur hi ka ngâingam lo a ni.
Ka grape wine in turah damdawi an lo telh a, chu damdawiin ka taksaa hna a thawh meuh chuan mihring pangngai pawh ka ni tawh lo. Ka sawi ngam tawh lo; mahse, nang lo chu ka ngaihtuah lo asin. Kha mihring, mipa azawnga tenawm ber khan khawngaihna leh lainatna nei miah lovin min pawngsual a, kei lah damdawi hna thawh avangin tang tur ka awm si lo. I hming ka lam char char asin, eng a ti nge min rawn chhan loh... i awm si lo tiraw?
Mihring pangngai rilru ka put leh meuh chuan i tan mi tenawm ber ka lo ni ta. Ka hmu ngam tawh lo che a ni satliah mai lo, i aw tak ngial pawh ka hre ngam tawh lo. Ka hre chak lo a ni lo va, ka hmu duh lo che a ni hek lo, ka ngam tawh ngang lo zawk a ni. Kha zan khan nangmah ka ngaih em vang chea grape wine kha in ka ni asin; lo tih loh tawp tur a ni a. Kan ina i lo kal ni te khan ka tap a; nangmah ka hmuh chak luat avangin. I haw hnu khan pawna i thutna ngeiah khan rawn thuin, i awm tawh lo tih hre rengin ka zawng ru che a, i rawn lan leh mai te kha ka beisei a; ka va ngai tak che em! I aw ka hre chak lutuk ringawt pawh hi âtna tham chu a ni tawh. Ka thinlung chhung rila inthlahrunna awm hian nangmah hmu ngam lo turin pindanah min khar khum a, khaw eng hmu ngam lo tur khawpin min sawisa a, min chhan theitu awm chhun nang lah chu ka beisei ngam tawh si lo che. Ka chau ta, ni tam tak chaw ka ei thei tawh lo va, ka muhil thei bawk si lo, dam pawh ka dam rei tawh lo ang. Ka nu’n min awm tawp a, nilengin ka tap a ni ber mai. Ka nu pawh hian min hnem thei tak tak lo, a lungchhe tap hi ka hmuh hmaih ngai lo; mahse, tu nge inhnem chuang ang?
A tawp ber atan, nang ka lo tawng che hi ka lawm a, hlimna min lo pek tawh zawng zawngte kha a mal phei chuan ka hre seng tawh lo. Ka thinglungah leh mitthlaah an cham reng a, ni tin hian khang nite kha ka chhui a , koh kir leh ka chak thin. Ka nunna hi keiman ka la ngam lo a, min Siamtu ka zah luat avangin; mahse, aman a lak hun ka nghak tawp tawh thung si He ka hringnun chawhnu tawh tak, ka dam ni upa tawh lamah hian Pathian khian duh thlan tur pakhat chauh pawh min pe se; ka hmangaih, ka thih hma ngeia i hmui fawh lo chu thlan tur ka nei lo, chu chu ka thih thlamuanna tur awm chhun a ni. Hmmm… kei chu ka dam rei tawh dawn lo, khawngaihin min theihnghilh la, i hringnunah kei ang hmeichhe vanduai hi i tawn nawn tawh loh nan Pathian ka lo dilsak ang che. Chu chauh pawh chu a ram thlen min chaktirtu a va ni si em… mangtha… mangtha… ka hmangaih che.

Lehkha ka chhiar zawh chuan Kim Kimi nu chu ka’n en a, a mittui a lo hru char char a ni tih ka hre chiah. Eng mah sawi lovin ka chhuak a. Rahlum North-a Kim Kimi te in lam chu hman-hmawh taka ka pan lai chuan a nu pawh chuan min rawn zui ve nghal a. Mahse, a tlai tawh, an in ka thlen hma chuan tlangval tlawmngai tak tak te’n Kim Kimi te ina bungrua an thiar chhuak chu ka hmu ta, hrilhfiah leh chuan ka ngai tawh lo. Ka mit sulh sulh a, ka lu a hai mum mum a, eng mah ka hre chiang thei ta lo. Ka hminga hmeichhe aw-in min ko ri ka hre zuai zuai a; a chiang lo. Tap thawm leh au thawm ka hria a, dar ri pawh a tawp lam chu ka hre hman; mahse, kei hi khaw’nge ka awm?

A LETTER FROM DI HLUI

Dihlui,

a hmasain he ka lehkhathawn tlawm tak hi, nangmah ka beisei leh i khawngaih ka duh vanga ka ziak a ni lo tih min hriat sak la ka duh.

Awle, ka sawi duh chu- Khatia rinawmna biahthu der min hlan ni atang kha'n, kei chuan ka chhungril duhthlanna nen chhanna anka nem ka hlan che a. Khami ni ngei kha'n nang hian ka thinlung hmun ruakte kha i luahkhat a, ka tan a khuanu ruat i nih beiseina nen ka hma hun kha ka thlir thin a sin.

I message- thlum tak tak te kha'n ka ni hman a tinuam a, ka mal bik loh zia min hriattir thin. Ka tan chuan ka neihchhun, ka khawvel leh ka engkim i ni thin. Nitinin ka ngaihtuah che a, suangtuahna nen ka hun leh ni ka chhiar liam thin a sin. I la hria em? Kha zan, chhungte pawh rawn lova nangmah hmu tur a zan khawvawt a ka rawn chhuah zan kha, kha zan kha'n nangmah vangin ka pa in min beng a, ka rilru ana takzet, mahse nangvang a vawikhat ben kha chu engahmah ka ti lo, a chhan chu, i tan chuan ka taksa leh nunna pawh hi ka hlan phal asin. Duat tak a min pawm lai kha'n khawvela hmeichhe vannei berah ka in ngai thin a, i lak a pangchang tak a awmte kha nuam ka tiin, i duat nih kha ka hlimna ber a ni thin a sin. Ka hming a min ko phal lo a duat tia min koh thin laite kha'n, ka chhungril hi a lawm a, ka tawng che hi vannei ka in ti ngawih ngawih thin. Nghet tak a min kuah changte kha'n, i bulah chuan ka thla amuang a, ka him hliah hliah in ka hre thin. Nang hmuh nan che kha'n hreh leh hlauh ka nei lova, mahse nang vang kha'n ka chhungte kha'n min va'n hau zing thin em! He he, mahse a pawi lo, a pawi reng reng lo. " Nakin lawk ah i kiangah hlim tak leh thlamuang takin ka la awm dawn a lawm", mahse, chu zawng engtikahmah a thleng ngai dawn si lo a nih hi.

Ka hria, ka hai lo, mipa tha tak ini, mahse ka tan chuan, thih hial duhna khawp hliam min siamtu i nisi. " Rinawm takin aw", ti a biahthu kan in hlan te kha'n i thinlung a thleng ve phak lo em ni? Engah nge mal tak leh baihvai tak kha'n min kalsan. I tan ka engkim ka hlan hnu ah che pawh kha'n, nang chuan i thinlungah midang tan hmun i la kian thei si maw? Ka va'n hrethiam lo teh lûl em! Nang vang a hrehawm ka tawrh zozaite kha min hriatpui ve ni la chuan, i tangah duat taka min pawmin min fawp ve leh mahna, mahse khang hunlai zawng zawng khan khawiah nge i awm? Min tihnat em em lai pawh kha'n ka ngai che a, min hnem theitu chu nangchauh kha i ni a sin.

Tlai a lo ni a, sawichhuak theih si lohin ka ngai vawng vawng che a,ka bianga mittui luang zawih zawih chung kha'n ka thinlung chuan i hming a la lam fan a, ka chhungril a khur a, midang i nei tih hrereng chung kha'n lokir leh la ka ti ngawih ngawih a sin. He ka takse chak lo tak leh ka thinlung no tak te hian, heti ang natna hi an tuar chhuak zo dawn em ni? Vawikhat chauh tal pawh min kuah leh la ka duh a sin. Ka thianghlimna neihchhun leh ka hmangaihna hlu ber ka hlan che a, nang chuan a der mai maw min lo hlan. Hriatthiam a harin, tawrh dan thiam a va'n har teh lûl em! He ka hrehawmna a tang hian nang chauh lo chuan min kai chhuak thei si lo. I lakah eng pawi nge ka khawih a? Eng nge tlin lohna ka neih? Tih hi vawi tam tak ka in zawt thin. Mahse, nangzawng, auh kir rual lohin lengdang tawnah suihlung i her si. I hming ka hriat changte hian ka nghing deuh lâwih a, ka ngaihtuahna leh rilrute hi a buai vek niber in ka hria. Kha hmeichhia nen in chanchin ka hriat phei kha chuan, ka puak keh lo chauh a ni ber. Mahse, tih theih rêng ka nei si lo.

Dihlui, a tawp nan hei hi hrilh che ka duh, i chen hnu taksa chak lo tak hi namên lovin a thinlung i hliam a, i tina takzet a ni. Mahse nang ka hmangaihna che hi nanga hmangaihna ang lêk a ni ve lova, chuvangin kei hi chuan englai paw'n ka ngaidam thei reng che a ni. Mahse, i hliam hnu ka thinlung leh, i khawihchhiat hnu ka taksa te hian, nang hi, engtikahmah an ngaidam thei ngai lo ang che. Inchhir a in dawm kun hun i neih hun ah te, bumtu leh i thinlung hliamtu i tawn ve hun ah chuan, eng ang chiah in nge kei hi ka nat a, eng ang a hrehawm nge ka lo tawrh chhuah i la hrefiah ve ngêi dawn nia.

Mangtha dihlui, mangtha mawlh mawlh aw...

LEHKHA HNUHNUNG

Ih maw Duhtak,

He zân khawhar takah hian ka theihnghilh lo che tih hria la,ka tan hian vûl tawh dawn lo mahla,i vul laia i mawina kha ka thinlung ah hian ka la vawng reng a,ka tan hian chuai ni reng i nei ngailo ang.

Hmangaihna avanga thinlung hliam hnu chu hmangaihna vêkin i thawidam a.Hmangaihnaa rinna a nghah tawh loh hnu pawhin nang chuan,"Hmangaihna hi tahna a nih si chuan tunge tahna ramah hian lût reng duh ang?chuvangin hmangaihna hi ring la,tap ngai suh ang che.." tiin ka thinlung sak tak kha min hneh sak ta kha a ni a.Hun rei tak hnuah nangmah vang chauh in hmangaihnaah rinna ka nghat ngam leh a,ka hringnun tlu chhe mek chu i tungding leh ta a nih kha.KA tan hian i va hlu tehreng em!

Rei tak chhûng i hmangaihna ka pawm lo chung pawh khan nang chuan min kal san ngai lo a.Khang avâng khan tun thlengin ka la inthiam thei lo a,ka chhân theih loh zawhna tam tak ka la inzawh phah fo thin reng a sin,khatih hun lai khan i hmangaihna kha ka ringlo a ni lo a,hmangaihna a vang a hliam nawn leh kha ka hlau em a tin ni..Mahni hma ka sial vángah chuan min ngaihsak lo ang tiraw.Ni e,khatih hunlai khan ka thinlung a hliam na ém a tin ni..

Kha zân kha i la hre reng em?zan dang zawng aia eng chhawrhthlapui eng hnuaiah a vawi khat nan ka hmangaih thu ka hlân che nih kha.Ka tan chuan kha zân kha zan DUHAWM tak a ni a,engtik lai mah in ka theihnghilh ngai lo.Hun rei tak hnua hmangaihnaa rinna ka nghah leh na hmasa ber a ni a,kha taksa derthawng leh thinlung riangvai tak khan beiseina thar nangmah vang chauh in ka chhar thar leh a,ka tan i van hlu tak em!mahse tunah chuan ka thinlung i hliam nawn leh ta si a maw..!

Zahngaitu hian ka hlim hmel a hmu theilo pawh a ni ang e;Tu hnenahmah hlimna hi pumbilh tumin vawikhat pawh ka la dil chhin ngailo a,tahna leh lungngaihna hi ka chan tur a ni bik hauh lo.Mahse khawvel nunrawnna hian zahngaihna tel loin ka chungah ro a rel fo thin chu a nih si hi maw..!Ka tan khawvel hi engvang a nunrawng bik em em nge maw a nih le??Zahngaitu tan zahngaihna lantir tlakin nún ka hmanglo zawk em ni le..Hmangaihna avanga thinlung hliam,tahna leh natna in a tuam,kalsan hnu thinlung;he thinlung riangvai tak hian hnemtu a va'n ngai teh lul em..

Ih maw duhtak,nang ka ngaih zia leh mamawhzia che hi hria ni la chuan;luipui luang ri rehna piah a faisa ring a chawlh ai chuan,pialral khártung chu sáwn a,rihtlangpui chu rawn kán leh in ka tána i lo let leh hi ka ring thin a sin.vul leh tawhlo tur a ka tana khawvel parmawi ber i chuai ni kha ka hriatreng duh tawh loh ni,ni tihbaiawm;mahse kumkhua a ka theihnghilh tawh loh tur ni chu a ni..

He khawvel i hnuchhawn ni champha vawikhatna a lo thlen khan maw duhtak,rawn zui ve che tumin damna dawi chu thihna tûra hmangin thahnem tak ka ei a.Ka ei atanga reilote ah chuan ka bîng mup mup a,mu leh mal pawh ka hre zui mang lo.chiang taka ka thil hriat hmasak ber chu tuipui fàwn phûl ri bulh bulh chu a ni.ka'n hawi kual a,Dil zau takah chuan keimah chauhin lawng te taktéah hian lo chuangin,a karfung chu lain dil tui fawn nasa tak karah chuan ka inkar fat fat a.Rei fe ka inkar hnu chuan vaukam chu ka thleng thei ta hrâm a,tawi khumuang lo chuan ka hmaa tlang ding lurh lam chu ka pan ta nghal a.

Chu tlângah chuan lawnin a chhip ka han chuan a,chu hmun atang pawh chuan hring lam ka ngaih na chuan min pawt bet zo lo a,vawikhat te pawh ka hawi kir lo.Ka tan chuan hringlang tlâng pawh chu pialral min ngaih tirtu a lo ni zawk a.chu tlang ka lawn liam hnu chuan tui fawn phul ri te leh lui pui luang ri reng reng hriattur a awm tawh lo,a reh hian a reh thuap mai a ni.,ka hmalam pan chuan ka kal zel a.

Thui fe ka kal hnu chuan nunna tui fin tura lunglohtui lo luang chamdel chu ka va hmu a,a kam velah te chuan hawilopar an vul chûk a.Hawilopar vulna ruam ka kal pelh dawn chuan hla tak a tangin mi lo hmu a.Ka lam panin i rawn kal a,ka bul ilo thlen chuan kuah che ka tum a,i duh tlat lo.ka rawn kalna lam a kir leh tur in min ti a;mahse ka hnial tlat che a nih kha.chutah nang chuan, "min hmangaih a nih chuan khawngaihin kir leh rawh.I hmangaih tán hian vawi tam lehkha i lo ziak tawh thin a,vawikhat chauh a tân hian LEHKHA HNUHNUNG tal ziah sak leh ta che.Hmangaihna hmingin ka ngen a che".ti a min ngen avâng chauh khan he Lehkha Hnuhnung hi ziak ka ni asin.

I hmel hmuh zet a kir san leh che kha thil harsa tak a ni a.Kir leh tur a thu min tiam tir hnu khan nang chuan nuisang chungin min kalsan a,i liam hma chu thlir che ka tum a;mahse,ka mittui vang chuan rei ka hmu thei si lo che.Lunglohtui kamah chuan thingthi in ka tap a,ka tap chhuak hial a sin.mittui tam tak karah chuan thei leh thei lo in ka han meng a,ka khum bul a thu in ka nu chuan mangang takin min thlir reng a lo ni a.Rei tak chhung nikhaw hrelo a ka awm hnu a ka harh chhuah leh avang chuan ka nu biang ah chuan lawm a vang in mittui a luang hial a ni.Khami ni atang khan i tello a dam ka thlahlello ang bawk in ka tello a dam thlahlello ka nu a lo awm ve reng tih ka hriatchhuah phah ta a ni.

Ih e duhtak,he khawvel nunrawng tak hian a dan ngaite in thim tihbaiawm tak chu a rawn her chhuah pui leh ta.mi tam tak tan chuan zân hi hahchawlhna hun duhawm tak a nih laiin ka tán erawh chuan khawharna nunrawng leh lunglenna chimawm min thlentu,ka rilru tihnîm a,ka hliamte tina zualtu mai a ni si.Theih ni se he zan tihbaiawm tak hi kalhlèn ka van chak tak êm,mahse khuanu ruat a ni si lo,beiseina nen khawvar lo thleng tur chu ka thlir leh phawt mai a niang chu.Amaherawh chu i tello chuan zing nichhuak eng mawi tak hi vawi tam hmuh ka in beisei tawh lo a sin.

Duhtak,khuanu zahngaihna ka tana a kin ve a,khawvel nunrâwnna in ka chung a thu a neih tawh loh hunah chuan nangnen hian inDi bang tawh lo'ng aw...

MANGTHA LE KA HMANGAIH

Chumi zan a a thurualpui awmchhun,a khawhar luat vang a éng tha ngam reng renglo Chhawrhthlapui hnenah chuan lunglen luat ah mittui nen Jimmy-a chuan duhthu a sàm mawlh mawlh a..

Sulhnu hlui leh Di hlui tawnah tah a tul a,a hmangaih hmel kha that famkimna a thuam,mihring tawng pawh a HMELTHA tih loh theih loh,a pianpui ve reng emaw tih tur mai a zún ngah,a hmel hmuh ringawt pawh a nun ti nuam em em tu,a sakruang mawi zia lah melh thuak pawh a hai rual a ni lo..Shakespeare-a'n " Aw..i mitmeng mawi tak leh si-ar te khi an awmna inthlakthleng thei chu nise an éngah vartian ar a khúang ngei ang le.." a tih te pawh chuan a hmangaih mitmeng mawizia a la sawifiah pha meuhlo niin a ngai hial thin.A hmel a hmuh zin poh leh Siamtu pawh hian duhsak bik a nei niin a ngai hial thin a,a hmeichhepuite pawh in a nihlawh zia an hai hauh lo,tlangval te lah in a hmelthat leh duhawm zia hmu in an thlir ning thei hek lo.mahse chung a phuloh mawina te leh thatna te chu jimmy-a tan chuan tahna thlen tu mai an chang ta si.

Ni e,khawvelah hian chhuan tur nei ve mah suh se,a ni a nei a;nawmchenna tur neilo mahse a hmangaih bul a awm kha nuam a ti ber thin.a lung a awi hliah hliah a,an hlim lai ni te chu a chuai leh mai ang tih reng a ngaihtuah pha lo,mahse,hlimna te hian mi velh hun a nei thin tih a hre ta a..

Chhan leh vang pawh awm lo chuan a phone call leh sms te a chhang duh ta tlat lo mai,hmuh tur lah a awm si lo.khawkhat a cheng an lo nilo leh zel bawk nen,a awm a nuam lova,hlauhthawnna in a khat a,a thiltih engmah a tui hek lo.Nikhat a a àw vawikhat tal a hriat loh pawh a hrehawm a tih thin teh reng nen,a thla a thla tam a ral hnu pawh chuan a phone call chhang tur reng reng a awm tawh si lo a,Jimmy-a chuan a hmangaih em a vang chuan a ringhlel phal thlawt lo a ni ber mai.

Zan khat chu a khawhar lutuk awmngaihna hrelo chuan a nau number ah chuan a call ta ringawt a,Naupang tih tak ah jimmy-a rilru tur hre reng mahse han sawi dam dan vel a hre silo,"I ú hi a va dang sawt ve,Eng nge awmzia? " ti a a zawh chuan hreh hmel tak chung chuan ti hian a rawn chhang ta a,"U jimmy,Ka pa hian à ú hi ngaihzawng neih a la phal lova,in inzui tih a hriat phei kha chuan a thinrim lutuk in à ú a beng a,then nghal tur che in a ti a,in inzui tih a hriat leh vaih chuan a zirna zawng zawng tihtawp sak mai bak ah,i kalsanna tur a nih dawn phawt chuan engmah tihhreh a nei lovang.." tiin a hrilh ta a.Chu thu a hriat chuan jimmy-a rilru chu chhun ang mai in a ná a,a bing mup mup a,enge a ngaihtuah ber tih pawh a hrechang ta lo." I u chu reilote tal ka lo be thei ang em..? a han ti hram a.Pa ber awm loh lai a nih hlauh a vang in hreh tak chung in a han ko va,a Duat,a hmangaih em em in a phone a han dawm meuh chuan sawi tur a haih chham hle mai,mahse,hmangaihtu rilru puin a mipatna thinlung nena tangkawp in he thu hi a sawi thei hram a."Keimah vang a engkim i chán a,hrehawm i tawrh dawn ai chuan ka hmangaih vang zawk chein ka kian san zawk mai ang che,keimah vang a i tawrh hi ka duh lo asin," tiin..

Jimmy-a rilru na lutuk chuan tah vak mai a duh a,mahse mipa zawk a nih angin a insum hram hram zawk a,a mittui chu a biangah a lo luang chhuak ngiai ngiai a.A tawp nan " Ka hmangaih reng ang che " tih bak sawi tur dang a hre ta lo.a hmangaihi rilru ná insút ri hlap hlap thawm chuan a chhungril a fan a,mipa pawh a mipat reng theih ta bik loh.

Ni dangah pawh a call fo va,a pa a awm ve tlat thin avang in an in be thei thin si lo,Kar khat hnuah chuan a nau zawk chuan a rawn call ta hlauh a," U Jimmy,tuar thiam hram hram rawh.i sawi tawh ang khan i hmangaih a nih chuan kalsan la,rawn biak pawh tum tawh lo mai rawh aw.."Jimmy-a rilru a nà kher mai,chhan dan tur pawh hrelo a a ngawih reng lai chuan phone-a patling thinrim vîn thawm chu a hre ta a.."Tunge i nih?khawi a awm nge i nih?enge ka fanu i rawn tihbuai reng,i sawi lo a nih chuan police ah ka report dawn che nia,ka fanu te tibuaitu misual i nih kha.."Jimmy-a rilru chu a na in a thin a khei zak mai, mahse a insum hram hram a,"ka pu,min ngaidam rawh.." tih pah in a nihna leh a awmna hmun te chu a hrilh lo thei ta si lo a..

Jimmy-a tihngaihna hrelo chuan a pa chu phone a pe ta ringawt a,a pa hnenah pawh chuan a fapa chu derna tenawm tinreng in a ànkhum a,dàwt leh thudik chawhpawlh in a fapa chu misual ber,midang tihbuai ching ah a chhuah a,a nundan engkim hrechiangtu a pa chuan a fapa rilru na tak a awm mek chu a hném ta zawk a.mahse a hmangaihi pa tawngkam chuan a hliam nawn leh thin a,mahni lo mah a tlangval inrintawk lai tih tak ah a nih nih nihpui mai a duh rum rum a,mahse a hmangaih enkawl a chawiliantu a haw thiang si lo.mahni indemna tur a zawng leh ruai ruai thin..

A khawhar luatah a mittui a lo far leh zung zung thin a,nunhlui ngai a a tah ni lah a tam ta,Hlimna ruam zawh tuma a rilru a tihpaukhauh ve pawh in vawi tam tak lawmna famkim a beiseina thinlung bawk chuan a vel nawn leh thin si a.Lunglènga nunhlui a chhuikir chang pawh in beisei bo luatah a tah nan khua a sei thlawn mai ni hian a hre thar leh thin.ni e,thamral leh mai tur tiamthu an thlun a dawnkir changte hian vui lo thei lo ah a inngai thin.

A chang chuan a thinlung hliamtu chu huat ngawih ngawih a duh thin a,mahse chu a ngaihtuahna chuan a thinlung natna bawk a hnutchhiah leh thin si.A hmangaihna neih chhun nàt pui zel tur chauh in chakna a nei ta..

'Duhtak..khawngaih in i tan a ka thu ziah hi lochhiar chhuak hram ang che aw.. '

"Hun leh ni a vei zel ang a,hman a suihlung kan rualna hmun hluiah khan suihlung a léngkir lo thei lo vang a,engtinnge keimah chauh in ka lo hmachhawn theih tak ang le?Aw..khunu ruatloh Dî pawh hi khuanu ruat a nih ka ringhlel ngai lo asin.nangzawng i hringnun zawh tluang in hlim takin leng la,sana-in bàn a vai chhung leh,thàwk ka lak ve tek tek chhung chuan ka theihnghilh ngai tawh lo ang che.Nunthar in bul tan dawn mah ila,i tel ve lohna khawvel ah chuan nunhlui bawkin roreltu chan a chang leh àwm si a,finna káwna nunhlui ngai a tah ruai ruai thin ai chuan i sakhming leh i zûn te hi lungngaihna kawnah mittui nen ka lo tahpui tawh zawk ang e.he khawvel hi zawng kan tan a ruat a ni lo a ni mahna.Khuanu malsawmna dawng zel ang che,Engtikni ah emaw chuan intawnni te pawh a lo la herchhuak leh ngei ang a,chutih hunah chuan i hmangaih ni thin kha i tàn a mi chhuanawm leh i lei pathiante i dem theih nan zawhte a ngiau hun leh zangkhaw bungbut hun nghak in,thihna thlanthim hnuaia ka thut hma chuan he khawvel zirna hi ka tawpsan tawh lo vang a;ni e,kan pahnih zalenna tur in.Hlim reng la,dam reng la,chawimawina dawhsan a ka ding thei a nih mial chuan thiantha ber ang chuan min lo thlir ve reng ang ang che aw..
A tawp nan mangtha mawlh mawlh le ka hmangaih..

MITTUI NEN HMANGAIHNA

- Awmtea Leo Khiangte


Zân rei tak thleng kan meng a, chhûngte an mut reh hnu chuan… Kha mi zân tluka ka hlimna ang kha ka nun kal tawh leh la kal lehzêl tûrah pawh ka tawng leh tawh âwm lo ve. Ka pian tirh ata ke zeng, kal thei lo ka ni a, tûnah erawh ka pi min ṭawngṭaisakna avangin ka kal ve sawih sawih thei ta! Tin, natna chi hrang hrang ka nei nual bawk. Chuti chung pawha min hmangaih thei tlat chu a mak êm a, lâwm avangin biangah mittui a luang lo thei lo.
Kum 2008 February thla kha kan inhmuh vawi khatna a ni. Ka dinhmun hre reng chungin midang ka kâwm ṭhin a, khami ṭum pawh khân pangngai takin kan inkawm ringawt. Mahse, thil hi a lo mak ṭhin khawp mai… Keimah ka inen-a tling lo ka inti êm êm a, chuvang chuan ka chhâng thui ngai lo. Kei, pianphunga rualbanlo, eng tlâk mah ni lo hian min hmangaihtu ka tawng ve hi mak ka ti a, lâwm dân tâwk lah ka thiam hek lo.
Keimahah hian insitna leh indah hniamna (inferiority complex) ka nei nasa a, chûngah te pawh chuan min fuihin lehkhabu ṭha tak takte min
present ṭhin. Ka tân chuan ‘ani’ tluka hlu hi khawvêl hian a hring chhuak tawh mawlh lo vang! Amah ka tawn aṭang chuan ka nun hian phêk thar a kai a. Ka engkima ka engkim a ni chung pawhin a mi hmangaihna chu chhân lêt harsa ka la ti tho.
Hun lo la kal tûr ka thlîr a, a hlimna leh lâwmna thlen zo dâwnin ka inhre si lo. Chumi hunah chuan kei, ṭawmkailo hi hmusitin lêngdang min chhaisan leh mai lo’ng maw? Ka tân chuan engkim a huam a, atân erawh ka hmangaihna chiah a phût thung. Chu hmangaihna mak leh ropui tak mai chu kei, ṭawmkailo leh rualbanlo hian ka hnâwl reng phal dâwn em ni?
A tâwpah chuan ka chhâng ve thei ta a, a hlimzia chu sawiin a siak lo. Kei lah chuti tho bawk!
[Inthlahlel takin an inkuah vawng vawng a. Chu zân chu an tân zân mêllung pawimawh tak a ni. Chung chhawrthlapui pawh khian hmuh loh hlauin a bula chhûm dum chhah pui puite chu a hui kiang duak duak a. A êng mawi tak chuan chu zân chu a tiropui lehzual sauh a. Tûrnipui pawh chuan chu hmangaihna chu hmuh ve châkin a phi ruai a. Mahse a lan ve phalsak a nih loh avangin a vui nuah nuah a.
Perhpawngte chuan chu zân danglam tak chu rimawi tinrêng nen a mawi tâwk chauhvin an lo awi hlarh hlarh a. Chhûn lama chhuak ṭhin sa chi tinrêngte erawh chuan chu zâna hmangaihna pâr chu hmu ve lo tûra siam nia inngaiin an phun âwl lo va.
Khawpui ri bengchheng tûr te chuan an hmui an hup bet ṭhup a, chung lama rial rûm tûrte pawh chu an inkhap bet hrâm hrâm a. Ṭêk tla tûr pawh hun dang atân sawn a ni ta hial a. Chung vân sânga arsi êng phe un maite chuan hmuh fiah loh hlauin an rawn de chuah chuah mai bawk a. Malsawm ruah pawh a tûk atân khêk khal a ni. Vân zaipâwlte chuan hmangaihna hlapui rem an tum a, tawtâwrâwt pute pawh chu inkau reng mah se Pathianin thawm dang rêng rêng neih a phal si lo.
Hmangaihna petu chung Pathian meuh pawh chuan a Lalṭhutthleng aṭang chuan lâwm êm êmin a zuk thlîr ve vung vung a. Chu hmangaihna chu lei leh vân hian hmuhnawm tiin an thlîr vawng vawng mai zuk nia.]
Hun a liam zêl a, beisei loh takin a tâwpah chuan ka ṭah a ṭûl ta tlat mai! A rawn zin ṭum khân ka chhungten a beng hriatah pasal neia fa nei thei ka nih lohzia an lo sawi ni ngei tûr a ni. Chu chuan a rilru a tina a, a beidawn phah êm êm chu niin. Kei lah chuan ka lo hre si lo va, ka chhûngte chu ka’n hau ang bawrh bawrh a, mahse a sâwt tawh si lo. Keimah hian ka lo ti dik lo hmasa zâwk a ni. Hmangaih loh tawp tûr ka lo hmangaih a, engmah ni si lo hian mi hmangaihna ka lo chhâng ve ngawt atin a ni.
Min hmangaih tlat tih ka hria a, kei pawhin ka hmangaih ka bâng chuang hek lo. Mahse, chu hmangaihna chu mumang ang chauh a ni ta! Ka ṭhang harh a, a thâm ral leh ta mai si. Chu hmangaihna vanduai chuan a ṭahpui tûr khawpa na a tuar tawh a, pialral thlen hma loh zawng ṭapin kâwla ni chhuak a chhiar tawh dâwn a ni.
Ka mawi ve hun tûr chu khawvêl piah lam ramah chauh a ni ta! Chumi hunah tal chuan ka hmangaih, min hnâwl bîk tawh lo’ng che aw?

ZUNGBUN KHA

- Bena Râlte

“I a ta em ni a!? Mi zawng zawngin mawl an ti ngawt ang che, tu man inthen tawh vang ngawtin an ngaihzawngte thilpek an la let ngai lo, zungbun mai mai lehnghal, I thil tum hi a thing bon tawp!” tiin ka thianpa Sawmtea chuan ka thil tum chu min thulh tir ngei tumin Pi Zari thingpui dawra dawhkan pakhat kan kil dun lai chuan ngen leh hauh fawmin min fah mawlh mawlh a.
Mahse chu’ng ka thianpa thusawi chu ngaichang thei ziazang ka ni tawh lo, keimaha dik intihna leh ka chhungrila thinurna sosang zel chuan ka tum chu hlen ngei turin min tur a, mi tam zawk chuan thing leh mawl min ti reng ang chu, mahse ka chan hi an hriatthiam ve loh vangah ka ngai hmiah mai, pawi therte lo. Ka thianpa, mawl tih hmel taka min en ngawih ngawihtu pawh chu hnuchhawna ka tum ram chu pan turin Pi Zari thingpui dawr chu ka chhuahsan ta vuah vuah a.
Sawmtea-te ang mi awmthei fa tan chuan ‘zungbun mai mai’ a ni reng ang chu, a duhte chuan khatiang zungbunte chu kan veng nula zawng zawng daih tur pawh a pocket money atangin awlsam takin a lei nghal thei ngei ang. Mahse kei ve chuan kha zungbun lei tur khan ka stipend atanga sawma pakhat hi eng chen nge ka dah hran tawh a, zuk leh hmuamah pawh eng chen fakauva rei nge ka inhrek tawh hi tu man min hriatpui lo, chuvang chuan an ngaih ngaihin lo ngai ve mai mai teh se.
A man lam chu thukhat ni se, ka lak let duhna chhan ber zawk chu heihi a ni; ka hmangaih a, ani pawhin min hmangaih ve nia ka hriat vangin a tana ka tihtheih ropui ber nia ka hriat kha tihsak ve ka duh a, theihtawp tak meuhva ka intuak hnuah kha zungbun, pearl-a cheimawi ngei mai kha lei ve thei hramin kan inkara hmangaihna tinghet zual zel turin ka bun tir ta a nih kha.
Tunah chuan val dang a pawm tawh a, min hmangaih tawh lo, chuvang chuan ka la let leh tur hi a ni ringawt, a phu hlawl tawh bawk lo! Engah mah min ngai lova, chuvangin amah deu let nana ka tihtheih sang ber nia ka hriat, zungbun han lak let ve sak kha a tul tlat.
Ka rilru chu a na ve takzet mai, khawpui lian zawk lamah Sawrkar chawma thiamna sang zawk zirchhuak turin kan khua ka chhuahsan a tul a, ka kalsan dawn pawhin mittui karah rinawm thu kan tiam a ni lawm ni? Kar hlaah leng mah ila lehkha kan inthawn awl lova, a lehkhathawn hnuhnung berah pawh min hmangaih thu leh min ngaihzia thu a rawn thai kur ve dup a nih kha!
Amah nena kan nunkhua a nawm ve nan tiin hrehawm pawh huamin ka bei ngawrh ve em em a, ngaih tha taka awmin chawlh chhung tawiteah pawh a hmel hmuh chak vang liau liauvin kan khua ka pan ve ta cheng a, ka thlen tlaia a chanchin ka hriat chuan mi a va tibeidawng si em! Ka thinrim lutuk chuan kan thenawma a thiannu ka ko nghal a, “Naktukah inah lo awm rawh se, a rinawm lohna vangin kan inkar hi engkim a tawp tawh a, zungbun kha ka rawn la dawn tih lo va hrilh rawh,” tiin ka tir phei nghal a nih kha.
Thikthu chhia ka ni hran lo, mahse kha pa kher kha chu ka thik a ni. Ka kalsan dawn pawhin kha pa lo hnaih lo tur khan thu kan inchah uluk hle a nih kha. Amah paw’n ka thikzia a hre vek, “He pa hi i be tha a nih chuan kei chu ka inthiar fihlim nghal ang,” tih hialin ka chah kha! Mahse engvangin nge Valentine’s Day tlaiah kher kher, kha pa nen kher kher khan Bike-a an inphurh chhuah?? Ka zungbun pek bun chung lehnghal khan! A hnuah pawh an inzui nasa khawp an tih chu! A…Ka va han la let dawn rua em!
Mahni inkhawngaihna nen inngaihtuah lungpuam teuha ka kal chuan kar lovah an kawt ka lo thleng ta reng mai, ka han hawi kual vel a, thil zawng zawng chu a pangngai vek an lo la ni e, an in kawta Saron buk te, ka leng hawn tlai changa tihrik hlau taka ka khar de de thin an gate te, min thlah paha kan din dunna leh chhawrthla eng hnuaia kha zungbun ka buntirna hmun Sertawk hnuaite nen lam khan, a ngai vek an la ni e, mahse keini zawng kan pangngai ve ta si lo.
A lungkuai zawnga ka thlir chuan ka dik lo zo dawn tlata hriatna ka neih vangin an verandah lam pan chuan ka pen ta hmawk hmawk a, kawngka bulah chuan ka han ding leh vang vang a, dik tak chuan ka hreh a ni. Tum dang ang chu ni se an in kawng pawh kha thui ka ti leh em em ang a, an verandah-a tawi khawmuan chu sawi loh, a hmel hmuh chak vang khan kawngkhar pawh kik buai lovin ka lut leh rawk rawk ang chu. Mahse tunah zawng thil tum dang ka nei ta tlat a, ka tumdan chu ka duhdan a va’n ni lo em! Mahse mipain thil tum kan nei a nih chuan kan ti tlang tur a ni.
Tichuan kawngkhar chu pan hnaiin ka’n kik ta a, rei vak lovah chuan chhung lamah pen thawm a lo awm a, kawngkhar kalhna inhawng ri rakin a zui leh a, chutah a rawn inhawng ta.
Ama’n a rawn hawn chu lo beisei tho mah ila chutia kan han inhmachhawn thut mai chu ka hamhaih kher mai, keimah ang bawk chuan ani pawh chu a hamhaih ve tho chuan ka hria. Tawng nachang hre lova kan inhmatawn vang vang hnu chuan a kun ta daih a, mahse a mit atanga tui lo hnam tiam tiam chu ka hmu hman tho, chutah dah pawh rawn dakchhuak chuang lo chuan,
“E, U Rin nang I ni maw? Lo lut rawh”
Ngawi reng chuan ka zui lut ve tawp a, an inchhung pawh a la ngai vek, an sitting room laiah chuan dingin ka’n hawi kual vel a, mitthlaah chuan amah nena kan lo chet dun tawh dante chu mitthlaah a lo lang uar uar a. Tawng pawh tawng chuang lo chuan zaizirin a hmaa ka lo thut fo tawhna thin chair chu min han kawhhmuh a.
“Ngawi teh Mawite, thu hman pawh ka ni lo, sawlaiah sawn ka thiannu’n min nghak a…”
Mawitei bula ka dawt sawi hmasak ber a thleng ta, mahse a nih tur ang kan ni zo tawh a pawi pawh ka ti chuang lo, han deu ve hlak kha ka duh pah hrim hrim.
“E, a ni maw..”
“Aw ni e, ka rawn kal chhan chu……Zungbun kha rawn lam ka tum a, I thiannuin a lo sawi tawh tho ka ring a….”
“E, ni dawn tak e….”
Thawk la hak paha phawi tura a kut dinglamin veilama a zungbun a ban lai chuan kei chuan chhuanlamah banga thlalak intar en pah chuan ka lo hnungchhawn ta daih a, rei vak lovah ka hnunglam atang chuan zawi sap hian,
“U Rin…”
“Eng nge ni?”
“Ka phawi zo miah lo…”
“Ngati nge??”
“A….a tang tlat.”
Ka han lehhawi chuan kun chal chung hian a kut dinglam chuan veilam chu a lo dawm ran a.
“Ka lo tum ve chhin dawn em niang?”
Rawn hawi chhuak chuang lovin ngawi reng chuan a kut chu a rawn phar chhuak ve mai, chu pearl-a cheimawi zungbun chu a kutzunglaiah chuan a tle sep sep a, hmana ka nuin, “Pearl chuan mittui a entir a ni,” tia min hrilhte kha ka hre chhuak uai uai mai, a lo dik hle mai, keini pahnih inkarah pawh mittui a rawn thlen ta chu a nih hi! Chu zungbuna pearl pawh chu mittui ang ta riaute hian ka han hmu leh hnuhnawh a.
A kut chu ka lo ban vat a, a lum thar thar mai, hmana ka bun tir lai ang chiah kha a la ni e, chhawrthlapui eng hnuaia hlimtaka kan inbuntir lai kha mitthla-ah a lo lang chhuak uar uar mai. Chutah phawi sak tumin zungbun chu ka han vuan a, mahse ka beisei loh tak mai thil ka tawng ta; chutia ka han vawn mai pawh chuan zungbun chu awlsam takin a vir kual thei tlat a ni, tan tlat ngaihna a awm lo reng reng, nausen pawhin an pawt phawi zo ang chu! Ka kaw hawk hian ka hria, khami zan khan eng thu nge a sawi tak khah??
“U Rin, he zungbun hi ka kuta a awm i hmuh chhung hi chuan i tana ka rinawmna leh ka hmangaih zia che hi hrechhuak thar leh fo thin ang che aw…” Chheiraw le! Thil hriat sual ka nei chiang mai! Tahzet chuan kei, tlangval ban sek teng tung pawh chu ka mualpho ta, pawt phawi turin chakna reng ka nei ta lo!
“A mak hle mai a, a tang tlat a nih tak hi,” ka ti ve ta ngawt a.
A sam tla hniang kar atang chuan lo hawi chhuakin min rawn en ta a, mittui tla tiau chunga a nui hmel chuan ka lo intihpaukhauh vena zawng zawng chu a thiat hneh kher mai! Phawi reng tum tawh lovin zungbun chu ka bun thattir ta zawk a, ka awma pawm bei tura ka hnuh hnaih laite chuan a inhnit feih feih tawh, tah aw tiau chung hian,
“U Rin ka thiam vek lo tih chu ka hria, mahse i ngaih ang hi a ni lo asin…..”
A sawi zawh hma chuan ka kutzungchalin a hmui chu ka lo hup sak a,
“Bawihte a tawk e, ka bulah dawt I sawi ngai lo, thil hriat sual vang mai mai a niang e.”
Fawp tura a khabe ka dawmkan lai chuan min en kiau a, nui sak chung hian,
“I thiannu chu…?”
Mawitei tluka hmeichhe dang nghaktu tur ka neih lohzia hrechiangtu hi an awm awm lo ve!

HMINGTHANSIAMI

“Engvangin nge mipa bulah zu te a in teh reng, pawngsual chu a phu ve reng a nih chu” tia comment tamtak a hmuh chuan, a phone chu a paih darh vek a. Mangang takin a khumah a bawk thlawp a.
A room kawngka chu vawi leh khatah a rawn intheh hawng țhuai a. Mitmeng phelh phung leh sen rûm chungin A pa chu a rawn lut a..”Bawlhhlawhnu, min va tizak ve leh! Mi zawng zawngin i chungchang an sawi hi i hria em? Kan case filed pawh kha ka witdraw dawn a ni” a ti țeng chhuai a. Hlau takin a pa chu a lo en a. Kut a rawn thlak dawn emaw a tih laiin, na zeta kawngka kharin a chhuahsan ta a.
Zanriah an ei dawn chuan, tuman an rawn ko lo a. Zanriah ei tur pawhin a chhuak ngam ta lo. Ni e, engkim kha a thiam loh a ni a niang chu..
Pawngsual kha a phû ve reng pawh a lo ni mahna le..amah leh amah chu a inringhlel a. A inten a. A inhaw ta hial a! Tu in nge a buaina runthlak tak lak atang chuan rawn chhanchhuak ta ang le?.
“Joel,min țhen suh. Min phatsan suh. Theihtawp ka chhuah ang” tia a bialpa a ngen ngawih ngawih lai te kha a mitthlaah a rawn lang a. Thla tam tak chhung rinawm taka a lo zui thin mipa khan, amah chauha khawvel hmachhawn turin a hnutchhiah a nih kha. Ni e, hmeichhe zei leh mipa tihlawm thiam tak a ni lo a. Hmangaih a tawn vawikhatnaah bumthiam a tawng a. Hmachhawn dan tur chu tawnhriat pakhatmah a la neih loh miau avangin a thiam lul lo mai. Amah aia tinuam thei leh tihlim thei hmeichhe dang bulah Joela chuan a kalsan a. Lo kir leh turin tlawm theih tawpin a ngen zawk a nih kha..mahse, a hmangaihna chu rahbeh a ni a, ani chu hnawl a ni.
Chhungril nun hliam chunga a dera nuihna te chu a hne ngawih ngawih a. A hmangaih chu a lo kir leh tak mialin tiin nitin beiseina a nei a. Zanah a beiseina chu a țah pui leh thin.
“Hmingte, ani lo pawh mipa dang an tam alawm..kan zawng dawn nia” tiin a țhian țha ber Muana chuan a hnem a. A lemin a lo nui thung. Mipa dang chu an tam, a hmangaih erawh pakhat chauh a ti rilru a. Zan khat chu a thianpa Muana chuan a țhiannu b’day lawmna party ah a rawn hruaichhuak a. A nu ngei pawhin ” Va intiharh ve rawh. Heti ber bur reng ringawt zawng a hahthlak ê mai” tiin phalna a pe a. Muana nen chuan an chhuak dun ta a. An țhiannu te inah chuan an lo awm ve nual a. A țhen an lam , a țhen an in dût!! Chutiang ri nuaih nuaih chu a kham a, pawn bathlarah a va dak kual mai mai a.
Muana chu rawn kalin,ngaihtuah hmel zetin ” Hmingte, dam vat tawh la ka ti. Hmana Hmingteii kha ka hmu chak” a ti ham ham a. Ni e, ani pawhin chu chu a duh alawm.
Muana hi mi tamtak zinga a mi rin awmchhun a ni a. A inbunruahna leh a țah khum ngam awmchhun a ni. Thei tui a rawn pe a. A lo in ve mai a. Eitur an sem zawh hnu chuan haw mai a duh a. Mahse, an țhiannu chuan a phal tlat lo a. Rilru bet lo zetin a țhu ve ta a. Muana chu a bulah rawn thuin, Whisky hi a rawn pe a. A lu a lo thing nar nar a.
“Zanin chauh chu hahdam takin awm ve rawh. Ka thlah haw leh dawn che lawm..i haw ngam loh leh kan inah i riak mai dawn nia” a ti a. A țhianpa hi chuan a ngaihtuah ve chiang alawm. Beer chu vawihnih a in ve tawh a. Tui a ti lo. Whisky chu a ban da da a. Vawikhat chauh tal Joela ngaihtuah lova mutthilh bawrh bawrh chu a thlahlel ngawih ngawih a lawm. A hnar hup chungin a lem ta pawp pawp a. A pum chhung sa thla vawn vawn chu a hriaa. No 2 na pawh a lo lem leh hmiah a! A han ding a. A luhai avang chuan a thu leh a. No 3 na erawh a lo hnar a.
Joela theihnghilh tum si khan a zu in avang chu ni maw…ahrechhuak zing zawk a! A țah a chhuak a. Bathroomah a vațap ta chiam a! A rawn chhuah leh chuan an țhiannu khan Zu a lo pe leh a. “Chatthla khawpin in ila a tha ang” ti rilru chungin a lo tlak leh pawp a. Thil ei tha vak si lo nen a zo lo kher mai. Muana chu hawpuiah a sawm a. Ani lah a la laklawh si. Thlang lam bathlara chairah chuan thuin a muthlu ta a.
A harh leh chuan a awmna hmun chu a hre hauh lo. A vawt em em a. A han hawikual a. Nghet zeta a sama țham a ni tih a hria. Au chhuah a tum a.
Kut hian a rawn hnawh phui ta hmiah a. Mipa țawng bul bul ri a hria a. Pahnih anni tih a hria. An rawn pawttho lawp a. An awmna hmun chu thlanmual ani tih a hria. A hlau ta kher mai.
Pawngsualna rapthlak tak chu țan a ni ta. Theihtawp chhuahin a lo bei let ve a. Mahse, a naka an chhuihna te, a hmaia an hnekna te avang chuan a chau em em a. A auchhuak thei der si lo.
Dimdawihna tel reng reng loin kha leh chen a lo vawn him, a hmangaih ber Joela tan pawha a hlan phal loh..a thianghlimna chu tihchhiat a lo ni ta. A țap lo a. A chhungril erawh a rûm kawk kawk a. Inthah ve hial mai a nâp hial anih kha..a țhian tha ber Muana kha khawiah nge a awm tak le?
“Hmingte, min ngaidam rawh. Ka bialnu nen khan kan laklawh sia,ka țhian rinngam nia ka hriatte kha in veng lamah an haw dawn tho sia. Thlah haw ve mai tur chein ka ti a..ka lo tisual a ni” tia ngaihdam diltu a thianpa chu vawikhat a melh a. A melh nawn leh tawh lo. Rinna chu khawiah nge a thlawhbo tak a hre ta lo.
A tirah chuan a chhungkua leh thenrualte chuan an khawngaihin, a lamah an țang em em vek a. Mahse, ” Hmingthansiami pawh khan zu a rui alawm” tih sawi rik a nih hnuah chuan…a lamțang nia a hriatte kha amah diriama a chala phung kawktu an lo ni ta zawk si a! Hringnun ânchhia chu a tan tawrh a harsa em em ani.
A pain a case file a a lakir tih a hriat chuan chhun ang a na a. Inkhawm tura a kawngkal te chu ” Uire melh takin an melh a” phun zui thawm leh nuih el na te chuan an hual vel avangin Biakin chu a hnaih ngam ta lo. Class a kal ngam tawh lo a. A room zimte chu a khawvel a ni mai si. A nu bulah tal inbunruah a duh a. “Nanga zurui thusawi kha ka ngaithla peih lo. Hmeichhia te te si engvanga zu te in ve ngawt nge maw i nih le?” Tih chhanna chauh chu a hlawhchhuah awmchhun a ni. Kar khat chhung zet khawvelin a diriamna bihruksan a tum hnuah chuan, thutlukna a siam ta a. Hmeichhe chak leh huaisen a ni lo a. Hmeichhia a zawnga derthawng leh nêm tak a ni. Mahse, a thawnthu tawpna tur erawh huaisen takin a hmachhawn a. A hlen ta ngei bawk.
Sunday zinga a rooma an va luh chuan, A kawnghren hmanga inawkhlumin an va hmu ta a!! HMINGTHANSIAMI CHU A KAL TA…
“Dinhmun khirh taka ka din laia reilote ka hahdam beiseia ka mi rinngam bula zu ka in ve avanga, Pawngsual ka tawk hi ka phû tawk ve reng a nih ngai chuan, Pathian tan pawh ngaihdam tlak ka ni tawh chuang lo ang. Ka taksa rethei leh chau tak hi ka thlah ang a. Ka thlarau chu he lei hrehawm takah hian vakvai kumkhua mai rawh se.
Kan mirin em em te, kan rin anga an lo awm loh avanga a ringtu keimahni zawkin dem kan hlawh dawn a nih si chuan, ‘ka hmeichhiatpuite hian tu chungah mah rinna nghat tawh lo se’ tih hi ka thuchah hnuhnung a ni e. Ka awm ve loh avanga hlima nui tur ka chhungkua te chu kei an fanu mi tenawm leh tlaktlai lo avanga inchhir hnuhnawh lo turin ka ngen bawk e” tih chu Hmingthansiami thuchah hnuhnung a ni.
“TUEMAW THILTIH KHA I DEM DAWN ANIH NGAI CHUAN, A DINHMUNA DINGIN, PAWISAK NEI LO LEH DUHTHLANNA SIAM THIAM LO KHAWPA RILRU MANG VEKA I AWM HUNAH LEH CHUNG THIL CHU I PALTLANG VEK HNUAH CHAUH, MIDANG DEMNA CHU I PHUHCHHUAK DAWN NIA..ka țhian”